Баҳодир Жалолов навбатдаги рақибини ҳам муддатидан олдин таслим этди

Англиянинг Манчестер шаҳридаги “Co Op Live Arena” мажмуасида ташкил этилган профессионал бокс оқшомида икки ҳамюртимиз Баҳодир Жалолов ва Жавоҳир Умматалиев рингга кўтарилди.

Жумладан, оқшомнинг супер оғир вазн тоифасида ташкид этилган жангда Баҳодир Жалолов навбатдаги жангини хорватиялик Агрон Смакичига қарши ўтказди. 

10 раунд этиб белгиланган ушбу беллашувда Смакичининг бурчаги саккизинчи раунд аввалида жангни давом эттиришдан бош тортди. Натижада эса Баҳодир техник нокаут орқали ғалаба қозонди.

Б.Жалолов учун бу муваффақият профессионал боксдаги ўн саккизинчи ғалаба бўлди.

Шунингдек, яна бир вакилимиз ҳаваскор боксда амалдаги жаҳон чемпиони Жавоҳир Умматалиев Польша вакили Дамиан Драбикка қарши рингга кўтарилди. 

Ярим оғир вазн тоифасидаги 6 раунд этиб белгиланган бу жангда чарм қўлқоп устамиз иккинчи раундда рақибини нокаут орқали таслим этди.

Жавоҳир Тошхўжаев, ЎзА