АҚШ ва Хитой етакчилари музокараси сиёсий бурилиш ясамади (+видео)
Музокара ва Оқ уйдаги зиёфат чоғи Дональд Трамп ва Си Цзиньпин Тайвань, Эрон, Украина ва сунъий интеллект масалаларини муҳокама қилди. Икки раҳбар ўртасида илиқ муносабат кузатилганига қарамай, ўзаро сиёсий бурилишга эришилмади. DW шундай хулоса қилган.
Трамп 24 сентябрь куни Оқ уйда ХХР Раиси шарафига тантанали давлат зиёфатини уюштирди. Байрамга АҚШнинг йирик технология компаниялари раҳбарлари, жумладан “Tesla” эгаси Илон Маск, “Apple” раҳбари Тим Кук ва “OpenAI” етакчиси Сэм Альтман таклиф қилинди.
Трамп нутқида Хитой ва АҚШ муносабати ҳар қачонгидан илиқлигига урғу берган. Си Цзиньпин эса анча босиқ оҳангда гапирган. Унинг таъкидлашича, ҳар икки давлат масъулиятли буюк давлатлар сифатида ҳаракат қилиши ва ўзаро муносабатга янгича ёндашув топиши керак.
“Синьхуа” агентлиги хабар беришича, Си Цзиньпин АҚШни Тайвань мустақиллигига қарши чиқишга чақирган.
Трамп май ойида Хитойга ташрифидан сўнг Тайванга қарийб 14 миллиард долларлик қурол-яроқ етказиб бериш бўйича келишувни тўхтатиб қўйган ва бу масалани музокара мавзусига айлантирган эди.
СИ жадал ривожланаётган бир шароитда Чин раҳбари ушбу технология ҳар доим инсон назорати остида бўлиши кераклигини таъкидлади. Манбалар фикрича, зиёфатда саноат соҳаси вакиллари иштирок этганига қарамай, Трамп Хитой юмшатишга ҳаракат қилаётган АҚШ технологияларини экспорт қилиш бўйича қатъий чекловни сақлаб қолади.
Шунингдек, АҚШ ва Исроилнинг Эронга қарши уруши масаласига ҳам томонлар қараши яқинлашгани сезилмади. Си Цзиньпин фақат ўт очишни тўхтатиш келишувига қайтиш тарафдори эканини билдирди.
Кенжа Бекжонов, Салимжон Обиджонов, (видео) ЎзА
