АҚШ Исроил ва Ливан ўртасида янги тинчлик ташаббусини илгари сурди
Исроил-Ливан чегарасида кескинлик авж олар экан, АҚШ маъмурияти можарони тўхтатиш учун янги сулҳ режасини таклиф қилди. Бу минтақадаги вазиятни ўзгартириши мумкин.
АҚШ маъмурияти Исроил ва Ливан ўртасида кучайиб бораётган ҳарбий кескинликни юмшатиш мақсадида янги сулҳ режасини таклиф қилди. Бу ҳақда расмий доирадаги манбаларга таяниб хабар берилмоқда. Давлат котиби Марко Рубио Исроил ва Ливан раҳбариятига можарони бартараф этишга қаратилган янги келишув лойиҳасини тақдим этган. Ташаббуснинг биринчи босқичида “Ҳизбуллоҳ” ҳаракати Исроил ҳудудига уюштирилаётган барча ҳужумларни бутунлай тўхтатиши лозим. Бунинг эвазига Исроил томони Байрут йўналишида ҳарбий амалиётни кенгайтирмаслиги ва вазиятни янада жиддийлаштирадиган қадамлардан тийилиши керак.
Манба таъкидлашича, Рубио сўнгги 48 соат ичида Ливан Президенти Жозеф Аун ҳамда Исроил Бош вазири Биньямин Нетаньяху билан телефон орқали мулоқот қилиб, мазкур режани муҳокама қилган. Нашр ёзишича, Ливан раҳбари мазкур тинчлик ташаббусини қўллаб-қувватлаган. Бинобарин, парламент маърузачиси Набиҳ Берри мавзуга муносабат билдирар экан, аввало Исроил ҳарбий ҳаракатни биринчи бўлиб тўхтатиши шартлиги, шундагина “Ҳизбуллоҳ” сулҳ шартига тўлиқ риоя қилишига кафолат бера олишини билдирган.
Ф.Яхшибоева, ЎзА
