“Адлия аёли” танловининг якуний босқичига тайёргарлик кўрилмоқда

Юридик кадрларни қайта тайёрлаш ва малакасини ошириш институтида “Адлия аёли” танловининг саралаш босқичи бўлиб ўтди.

Тизимда фаолият юритаётган хотин-қизларнинг ижтимоий-сиёсий фаоллигини ошириш, уларни қўллаб-қувватлаш ва рағбатлантириш мақсадида ташкил этилган анъанавий танловда институтнинг 5 нафар ходимаси иштирок этиб, финал босқичига йўлланма олиш учун ўзаро беллашди.

Жумладан, иштирокчилар «Мен ҳақимда» номинациясида 3 дақиқа ичида шахсий ҳаёт, касбий ютуқлар, қизиқишлар ва китобхонлик салоҳиятини тақдимот орқали ёритишди.

“Интеллектуал ва ҳуқуқий салоҳият” номинацияси орқали берилган ҳуқуқий казусларга (муаммоли вазиятларга) тўғри ва тезкор жавоб топиб, қонунчилик бўйича билимларни кўрсатишди. Шунингдек, “Қонунчиликка оид долзарб таклиф” номинациясида соҳани ривожлантириш ёки муаммоларни ҳал этишга қаратилган янги қонунчилик ташаббуси тақдим этилди.

Саралашнинг биринчи шартида юқори натижаларни қайд этган 3 нафар иштирокчи иккинчи шартда ҳам ўз билим, салоҳият ва иқтидорларини намойиш этди.

Якуний натижаларга кўра, институт ходими Севара Олимбоева барча шартлар бўйича энг юқори натижани қайд этиб, танловнинг мутлақ ғолиби бўлди ва “Адлия аёли” танловининг финал босқичида иштирок этиш имконига эга бўлди.

Гулноза Бобоева,

ЎзА