Зеленский Европани хавфсизликни мустаҳкамлашга чақирди
Украина Президенти Владимир Зеленский 25-Берлин хавфсизлик конференцияси иштирокчиларига йўллаган мурожаатида Европа давлатлари ва ҳамкорларни мудофаа ва хавфсизлик тизимини биргаликда мустаҳкамлашга чақирди.
Бугун давлат раҳбари расмий веб-сайтида эълон қилинган мурожаатда таъкидланишича, шиддат билан ўзгараётган замонавий дунёда ҳеч бир мамлакат ўз хавфсизлигини якка ўзи таъминлай олмайди. Шу боис Европа давлатлари ўзаро ҳамкорликни кучайтириб, умумий мудофаа инфратузилмасини ривожлантириши зарур.
Зеленский АҚШнинг дунёдаги роли кескин пасайиши мумкинлиги, шу аснода Европа, айниқса Германиянинг минтақадаги аҳамияти ва масъулияти янада ортиши лозимлигини алоҳида қайд этди. Шу билан бирга Вашингтон Европа учун муҳим иттифоқчилик муносабатида фаол иштирок этишни давом эттиришига умид қилди ва АҚШ ҳамда Европа давлатларига Украинага кўрсатилаётган ҳарбий ҳамда инсонпарварлик ёрдами учун миннатдорлик билдирди.
Унинг сўзларига кўра, Россия сўнгги йилларда барпо этган ҳарбий инфратузилма кўлами жуда кенг бўлиб, фақат Украинага қаратилмаган, балки бутун тинч ва бирлашган Европага таҳдид солади. Шунингдек, Президент сунъий интеллект, дрон, космик технология ва ракета ҳужумидан ҳимояланиш каби янги хавф-хатарларга қарши якка ҳолда курашиб бўлмаслиги, энергетика хавфсизлиги ва Қора денгиздаги экспорт йўллари барқарорлигини таъминлашда ҳам ҳамжиҳатлик зарурлигини таъкидлади.
Замонавий таҳдидлар асносида яккаланиб қолиш бошқаларнинг хом хаёли қурбони бўлишга олиб келишини эслатган Зеленский Берлиндаги анжуманда Европа давлатларини ягона ва мустаҳкам иттифоқ бўлиб ҳаракатланишга чақирди.
Ф.Яхшибоева, ЎзА
