Өзбекстан мен Қазақстан халықаралық бизнес ынтымақтастығын кеңейтуде

Өзбекстан мен Қазақстан арасындағы стратегиялық серіктестік соңғы жылдары қарқынды дамып, сауда-экономикалық байланыстар мен инвестициялық ынтымақтастық жаңа деңгейге көтеріліп келеді. Екі ел өзара тауар айналымын ұлғайтып қана қоймай, өңірлік логистика, өнеркәсіп, ауыл шаруашылығы және кәсіпкерлік салаларындағы бірлескен жобалардың санын көбейтуге басымдық беріп отыр.

Осы бағыттағы жұмыстар аясында Өзбекстанның Қазақстандағы елшілігінде «Астана» дипломатиялық клубының президенті Қайырболат Сахметовпен кездесу өтті. Бұл туралы «Dunyo» ақпарат агенттігі хабарлады.

Кездесу барысында Өзбекстан мен Қазақстан арасындағы сауда-экономикалық және инвестициялық ынтымақтастықты одан әрі дамыту, екі елдің іскер топтары арасындағы тікелей байланыстарды кеңейту және бірлескен бизнес-шараларды ұйымдастыру мәселелері талқыланды.

Сондай-ақ тараптар биыл күзде Эстонияның циркулярлық экономика, қалдықтарды басқару және қайта өңдеу салаларында жұмыс істейтін жетекші компанияларының бизнес-миссиясын Өзбекстанға ұйымдастыру мәселесін қарастырды. Бұл бастама халықаралық серіктестікті кеңейтіп, жаңа инвестициялық жобаларды жүзеге асыруға және заманауи экологиялық технологияларды енгізуге ықпал етеді.

Бүгінде Қазақстан мен Өзбекстан Орталық Азиядағы бір-бірінің негізгі сауда серіктестерінің қатарында. Соңғы жылдары Мемлекет басшыларының тұрақты кездесулері мен Үкіметаралық комиссиялардың жұмысы нәтижесінде өнеркәсіптік кооперация, көлік-логистика, энергетика және ауыл шаруашылығы бағыттарында ондаған бірлескен жоба қолға алынды.

Сонымен қатар екі ел халықаралық көлік дәліздерін дамытуға, шекара маңындағы сауданы кеңейтуге және инвестициялық форумдарды тұрақты өткізуге ерекше мән беріп келеді. Мұндай бастамалар Қазақстан мен Өзбекстан арасындағы экономикалық ықпалдастықты одан әрі күшейтіп, бүкіл Орталық Азия өңірінің инвестициялық тартымдылығын арттыруға ықпал етеді.