ФОТОРЕПОРТАЖ
Бухоро вилояти Автомобиль йўллари бош бошқармаси вилоят ҳудудидаги автомобиль йўллари соҳасида ягона давлат сиёсатини юритиш ва тармоқлараро мувофиқлаштиришни амалга ошириш, бошқарувчи ташкилотлар фаолиятини мувофиқлаштириш, автомобиль йўлларини қуриш, қайта қуриш, таъмирлаш ва сақлаш ишларини назоратни амалга оширувчи давлат бошқаруви органи саналади.
Бошқарма таркибида 18 та тизим йўл корхоналари томонидан хизмат кўрсатиб келинмоқда. Улар тасарруфида жами 225 та махсус техника мавжуд.
Вилоятда автомобиль йўллари умумий тармоғининг жами узунлиги 15 минг 500 км бўлиб, шундан бошқарма тасарруфидаги йўллар - 4012 километр, халқаро аҳамиятдаги йўллар - 486 километр, давлат аҳамиятидаги йўллар - 1120 километр, маҳаллий йўллар - 2406 километрни ташкил этади.
[gallery-21096]
2024 йилда Бошқарма томонидан шаҳар ва туман йўллари тартибга келтирилди. Республика ва маҳаллий бюджет маблағлари ҳисобидан жами 220 миллиард сўмдан ортиқ маблағ эвазига вилоят ҳудудидаги 857,4 километр автомобиль йўллари ҳамда 21 дона кўприк таъмирланди ва фойдаланишга топширилди. Шундан 460 километр умумий фойдаланишдаги автомобиль йўллари ва 397,4 километр ички хўжалик автомобиль йўллари таъмирланди. 209,9 километр йўл асфальтлаштирилди ва 187,5 километр ички хўжалик автомобиль йўллари шағаллаштирилди. Бундан ташқари, вилоят ҳудудидаги 8 та МФЙларнинг 80 километр тупроқ йўллари ҳашар йўли билан шағаллаштирилди ва ҳолати яхшиланди.
Вазирлар Маҳкамасининг 2021 йил 26 июлдаги қарорига асосан Осиё инфратузилмавий инвестициялар банки иштирокидаги “А-380 “Ғузор-Бухоро-Нукус-Бейнеу” автомобиль йўлининг 150-228 километр қисмини реконструкция қилиш ишлари давом эттирилмоқда. Шунингдек, Пешку туманининг “Туркистон”, “Навгахон” ва “Ўзбек” маҳаллалари бугун янгича қиёфага кирмоқда. “Осиё тараққиёт банки” иштирокидаги “Миллий автомобиль йўлларни ривожлантириш” лойиҳаси доирасида қишлоқ автомобиль йўлларини реконструкция қилишнинг манзилли дастурига асосан, ушбу маҳаллаларнинг 15,5 километр узунликдаги йўллари бетонлаштирилаётир.
Тоҳир ИСТАТОВ (сурат), ЎзА