Янги ном, янги чемпионлар (+видео)
Фарғонада белбоғли кураш бўйича ўсмирлар ва қизлар ўртасида жаҳон чемпионати давом этмоқда. Вазнлар бўйича бирин-кетин ғолиблар аниқланмоқда. Улар орасида Ўзбекистон вакиллари тобора ортиб бораётгани қувончлидир. 60 килограмм вазндаги ўсмирлар баҳслари кеча кеч якунланди. Ғолиблик шоҳсупасига юртимиз вакили чиқди ва унинг шаънига Ўзбекистон байроғи кўтарилди.
– Белбоғли кураш спорти бўйича 10 йилдан буён шуғулланаман, – дейди жаҳон чемпиони Ҳумоюн Эргашалиев. – Кўп маротаба Ўзбекистон чемпиони бўлдим. Тожикистон, Венгрия, россиялик рақибларимни енгиб, финалда биринчи ўринни эгалладим. Бундай натижага эришишимда ота-онам, мураббийларимнинг ҳиссаси катта.
Белбоғли кураш билан авваллари йигитлар шуғулланган. Энди эса қизлар ҳам бу спорт турини ўзлаштирдилар. Бунда тажрибали мураббийларнинг ўрни катта. Жаҳон чемпионатида ўзбекистонлик қизлар ҳам юқори натижалар кўрсатишяпти.
– Кеча 44 кг вазнда белбоғли кураш йўналиши бўйича Зиёда Фозилова иккинчи ўринни эгаллади, – дейди ўзбекистонлик мураббий Мафтуна Агзамова. – Бугун шу йўналишда Мухлиса Абдукаримова курашади. Бувайда туман спорт мактабида 60 дан зиёд қизлар шуғулланиб келишмоқда. Булар орасида кўплаб республика, Осиё, жаҳон чемпионлари бор. Ташкилотчиларга миннатдорчилик билдирамиз.
<iframe width="650" height="420" src="https://www.youtube.com/embed/Npfo6dIzSFY" title="Yangi nom, yangi chempion" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Эртага эркаклар ва аёллар ўртасида Осиё чемпионати бўлиб ўтади.
Муҳаммаджон Обидов, Элёр Олимов (видео, сурат), ЎзА
