Янги ихтирочилар авлоди вояга етмоқда

Бугун дунё тараққиётини сунъий интеллект, робототехника ва рақамли технологиялар белгилаб бераётган бир пайтда ёш авлодни ана шу соҳаларга қизиқтириш ва замонавий билимлар билан қуроллантириш ҳар бир давлатнинг стратегик вазифасига айланмоқда. Мамлакатимизда Президентимиз ташаббуси билан ёшларни қўллаб-қувватлаш, уларнинг иқтидорини рўёбга чиқариш ва энг чекка ҳудудларда ҳам замонавий таълим имкониятларини яратишга алоҳида эътибор қаратилаётгани ўзининг амалий натижаларини бермоқда.

Бунинг ёрқин намунасини Бухоро вилоятининг олис ҳудудларидан бири бўлган Олот туманида ҳам кўриш мумкин. Бугун мазкур тумандаги 1-умумтаълим мактабида фаолият юритаётган робототехника, дастурлаш ва сунъий интеллект тўгараклари нафақат ўқувчиларнинг билим ва кўникмаларини ошириш, балки келажак муҳандислари, дастурчилари ва ихтирочиларини тарбиялашда муҳим майдонга айланмоқда.

Тўгаракларга “Келажак маркази” мураббийи Комил Элмуродов раҳбарлик қилиб келмоқда. Ҳозирги кунда бу ерда 25 нафар ўқувчи робототехника, дастурлаш ва сунъий интеллект йўналишларида мунтазам таълим олмоқда. Машғулотлар жараёнида улар роботларни йиғиш, турли дастурий таъминотлар билан ишлаш, электроника асосларини ўрганиш, сенсорларни бошқариш ҳамда сунъий интеллект технологияларини амалий лойиҳаларга татбиқ этиш бўйича чуқур билимларга эга бўлмоқда.

Энг муҳими, мазкур билимлар назария билан чекланиб қолмаяпти. Ёшлар ўз ғояларини амалий лойиҳаларга айлантириш орқали инновацион фикрлаш ва муҳандислик тафаккурини шакллантирмоқда. Қисқа вақт ичида тўгарак аъзолари томонидан 20 дан ортиқ робототехник қурилмалар ва инновацион ишланмалар яратилгани бунинг яққол исботидир.

Ушбу меҳнатлар ўз самарасини ҳам бермоқда. Робототехника бўйича вилоят миқёсида ташкил этилган мусобақаларда жамоа фахрли ўринларни қўлга киритган бўлса, республика босқичидаги нуфузли танловларда иштирок этиб, мамлакатнинг энг кучли ўнта жамоаси сафидан ўрин олди. Бу натижалар нафақат мактаб, балки бутун Олот тумани учун катта ютуқ сифатида баҳоланмоқда.

– Тўгарак фаолияти давомида ўқувчилар томонидан яратилган ҳар бир лойиҳа уларнинг амалий билимларини мустаҳкамлашга хизмат қилмоқда, – дейди тўгарак раҳбари Комил Элмуродов. – Биз ёшларга муаммоларни таҳлил қилиш, инновацион ечим топиш ва замонавий технологиялардан самарали фойдаланиш кўникмаларини шакллантиришга алоҳида аҳамият қаратяпмиз.

Мактабда шунингдек 20 нафардан ортиқ иқтидорли ўқувчилар аниқланиб, улар билан мақсадли иш олиб борилмоқда. Улар турли фан олимпиадалари, технологик танловлар ва инновацион лойиҳаларда иштирок этиб, муносиб натижаларни қайд этмоқда.

Айни вақтда тўгарак аъзолари янада мураккаб ва истиқболли лойиҳалар устида иш олиб бормоқда. Жумладан, овоз орқали бошқариладиган роботлар, тасвирларни аниқлаб таҳлил қиладиган ақлли тизимлар ҳамда сунъий интеллект асосида ишловчи инновацион қурилмаларни яратиш режалаштирилган. Бу эса ёшларнинг халқаро майдонда рақобатлаша оладиган даражада билим ва тажриба тўплаётганини кўрсатади.

Тўгарак раҳбари Комил Элмуродовнинг шахсий ютуқлари ҳам эътиборга лойиқ. У сунъий интеллект соҳасида республика миқёсидаги малака ошириш дастурларида фаол иштирок этиб, юқори натижаларга эришди ва Корея Республикасида малака ошириш имкониятини қўлга киритди. Бу эса халқаро тажрибани ўрганиш ва уни маҳаллий таълим жараёнига татбиқ этиш учун муҳим қадам ҳисобланади.

Эътиборлиси, бугун мамлакатимизда яратилаётган имкониятлар фақат йирик шаҳарлар билан чекланиб қолмаяпти. Президентимиз раҳбарлигида амалга оширилаётган ислоҳотлар туфайли энг чекка ҳудудлардаги ўқувчилар ҳам робототехника, дастурлаш ва сунъий интеллект каби келажак касбларини ўрганиш имконига эга бўлмоқда. Кечагина оддий қишлоқ мактаби ўқувчиси бўлган ёшлар бугун халқаро технологиялар билан ишламоқда, инновацион лойиҳалар яратмоқда ва республика миқёсида муносиб натижаларни қўлга киритмоқда.

Олот туманидаги мазкур тўгарак фаолияти бир ҳақиқатни яна бир бор тасдиқламоқда: иқтидор учун масофанинг аҳамияти йўқ. Агар ёшларга билим олиш учун шароит, замонавий технологиялар ва малакали устозлар яратилса, улар мамлакат тараққиётининг етакчи кучига айланади. Бугун робот йиғиб, сунъий интеллект дастурларини яратаётган бу ёшлар эртанги Янги Ўзбекистоннинг муҳандислари, олимлари ва технологик тараққиётини таъминлайдиган мутахассислар бўлиб етишиши шубҳасиз.

Зариф Комилов, ЎзА мухбири