XX ёзги Осиё ўйинларига тайёргарлик масалалари таҳлил қилинди
Жорий йилнинг 19 сентябрь-4 октябрь кунлари Япониянинг Аичи–Нагоя шаҳарларида XX ёзги Осиё ўйинлари бўлиб ўтади.
Унда 45 мамлакат спортчилари 43 та спорт турининг 71 та йўналишидаги баҳсларда ғолиблик учун кураш олиб бориши белгиланган.
Бугунги кунда қитъанинг бир қатор мамлакатларида миллий терма жамоалар, спортчилар мазкур комплекс ўйинларда муносиб иштирок этиш учун тайёргарлик ишларини олиб бормоқда.
Жумладан, Ўзбекистон спортчилари ҳам ушбу ўйинларда муносиб натижаларга эришиш йўлида белгиланган дастур ва ишлаб чиқилган “йўл хариталар” асосида машғулот ва халқаро мусобақаларда қатнашиб келмоқда.
Куни кеча cпорт вазири ўринбосари Шаҳрилло Маҳмудов ҳамда Миллий олимпия қўмитаси раиси ўринбосари Шерзод Тошматов етакчилигидаги мутахассислар таэквондо, оғир атлетика, гимнастика федерацияларида бўлиб, йилнинг энг муҳим комплекс мусобақаси ҳисобланган ёзги Осиё ўйинларига терма жамоаларнинг тайёргарлигига бағишланган тақдимотлар билан танишди.
Мазкур спорт федерацияларининг мутасаддилари, мураббийлар ва мутахассислар иштирокидаги тақдимотларда тайёргарлик ҳолатлари атрофлича таҳлил этилди. Ҳар бир спортчининг руҳий ва жисмоний ҳолати, ўтказилаётган машғулотлар мундарижаси кўриб чиқилди.
Муҳокамалар чоғида спортчиларнинг машғулот режалари, халқаро мусобақаларда иштирок этиш тақвими, Осиё ўйинларида эришиладиган натижалар мониторинги, спортчиларнинг кўрсаткичлари, ўқув-машғулот йиғинларига илмий-методик қўлланмаларни татбиқ этиш ва жамоаларга ажратилаётган тиббий таъминот ҳолати таҳлил қилинди.
Эслатиб ўтамиз, Ўзбекистон спортчилари 2022 йили Хитойнинг Ханчжоу шаҳрида ташкил этилган XIX ёзги Осиё ўйинларида 22 та олтин, 18 та кумуш, 31 та бронза медалларини қўлга киритган эди.
Т.Рўзиев,
ЎзА
