Вашингтон ва Пекин “online” дўстлашмоқда
АҚШ ва Хитой сунъий интеллект хавфи бўйича алоҳида мулоқот тизими яратишга келишди. Бу икки давлат технология соҳасида кескин рақобатлашаётган бир пайтдаги кам сонли ҳамкорлик ташаббусларидан биридир.
Қўшма Штатлар молия вазири Скотт Бессент Нью-Йоркда ХХР Бош вазири ўринбосари Хэ Лифэн билан музокарадан сўнг “АҚШ – Хитой сунъий интеллект мулоқоти”ни йўлга қўйиш масаласи кўтарилганини билдирди. Вашингтон СИ билан боғлиқ миллий хавфсизлик даражасидаги эҳтимолий ҳодисалар ҳақида ўзаро хабардор қилиб туришни таклиф қилган. Томонлар бу борада кейинги учрашувни ўтказишга келишган. Бессент таъкидлашича, СИ бўйича дунёнинг биринчи ва иккинчи йирик кучи ўртасида шаффофликни ошириш муҳим.
Мулоқот Дональд Трамп ва Си Цзиньпиннинг шу ҳафта режалаштирилган учрашуви олдидан бўлиб ўтди. Шунингдек, томонлар икки раҳбар май ойида Пекинда муҳокама қилган янги “Савдо кенгаши”ни ишга туширишга ҳам келишди.
“Синьхуа” ахборот агентлиги музокарани “самимий, теран ва самарали” деб баҳолаган, бироқ СИ бўйича лойиҳа тафсилотини келтирмаган.
Мусулмон Зиё, ЎзА
