Turkiya Eronning “Mahan Air” aviakompaniyasi parvozlarini to‘xtatmoqda
Turkiya rasmiylari AQSH Moliya vazirligi tomonidan Eronning xususiy “Mahan Air” aviakompaniyasiga xizmat ko‘rsatuvchi turk kompaniyalariga nisbatan sanksiya joriy etilishi ortidan ushbu aviakompaniya reyslari to‘xtatilishini ma’lum qildi. 21-sentabrdan kuchga kiradigan ushbu taqiq Eron va Turkiya o‘rtasidagi barcha yo‘nalishlarni qamrab oladi.
AQSH Moliya vazirligi Xorijiy aktivlarni nazorat qilish boshqarmasi Islom Respublikasi fuqaro aviakompaniyalari, quruqlikdagi xizmat ko‘rsatish provayderlari, yuk tashuvchi korxonalari va ehtiyot qismlar yetkazib beruvchilariga qarshi keng qamrovli qora ro‘yxat e’lon qilgan edi. Cheklovda xorijiy kompaniyalarga Eron firmalari bilan aloqani uzish uchun qisqa muddat berilgan bo‘lib, uchinchi mamlakat xizmat ko‘rsatuvchilariga nisbatan ham jazo chorasi qo‘llanishidan ogohlantirilgan. Shu munosabat bilan Turkiyaning “S Sistem”, “Mes Cargo” va “Sky Phoenix” kompaniyalari “Mahan Air” ga ehtiyot qismlar yetkazib berish, chipta sotish va samolyot xarid qilishda ko‘maklashgani uchun sanksiya ro‘yxatiga kiritildi.
Rasmiylar ta’kidlashicha, uch turk korxonasiga qo‘yilgan cheklov xavf-xatar bevosita aviakompaniyaning Turkiyadagi xizmat ko‘rsatish zanjiriga tahdid solayotganini ko‘rsatdi. Endilikda “Mahan Air” kompaniyasiga xizmat ko‘rsatuvchi har bir mahalliy tuzilma aeroport operatorlari, yerdagi xizmat, chiptaxona va bank kabi turli sohalar AQSH tekshiruvi va jazo chorasiga duch kelishi mumkin.
Shu bilan birga Anqara Tehron bilan ikki tomonlama aviatsiya bitimi, parvoz xavfsizligi va turk firmalarini yangi moliyaviy jarimadan himoya qilish nazarda tutilgan holda, boshqa aviakompaniyalar bo‘yicha ham vaziyatni baholashda davom etadi.
Kuniga Istanbul va Tehron o‘rtasida kamida uch reys amalga oshirib kelgan “Mahan Air” O‘mon va Gruziyaga ham parvoz to‘xtashini tasdiqladi.
F.Yaxshiboyeva, O‘zA
