Тошкент шаҳар ҳокими Шавкат Умурзоқов ва Туркиянинг йирик холдингларидан бири ҳисобланган "Demirören Holding" директорлар кенгаши раиси Йилдирим Демирўрен билан учрашув бўлиб ўтди.
Учрашувда томонлар қурилиш ва энергетикадан тортиб, меҳмонхона бизнеси ҳамда шаҳар инфратузилмасини бошқаришгача бўлган турли соҳаларда икки томонлама ҳамкорлик истиқболларини муҳокама қилдилар. Пойтахт ҳокими Тошкентда хорижий сармоядорлар учун яратилган қулай шароитларни таъкидлади.
Мулоқотда "Yangi avlod" махсус иқтисодий зонаси, "Yangihayot Industrial Park" саноат ҳудудини ривожлантириш, шунингдек, халқаро брендларнинг пойтахтимиз сайёҳлик ва меҳмонхона бозорига қизиқиши ортиб бораётганига алоҳида эътибор қаратилди.
"Demirören Holding" раҳбарияти Ўзбекистондаги ўзгаришлар суръатини юқори баҳолаб, қўшма лойиҳаларни амалга оширишдан манфаатдорлигини изҳор этди.
Томонлар мулоқотни давом эттириш ва ҳамкорликнинг мумкин бўлган йўналишларини пухта ишлаб чиқиш бўйича келишувга эришдилар.
Гулноза Бобоева, ЎзА