Трамп ва Нетаньяху Эрон масаласида келиша олмади (+видео)
АҚШ Президенти Дональд Трамп ва Исроил Бош вазири Биньямин Нетаньяху ўртасида Эронга қарши ҳарбий амалиётни тиклаш масаласида келишмовчилик юзага келди. Бу ҳақда Исроилнинг “Ynet” нашри ўз манбаларига таяниб хабар берган.
Маълумотга кўра, дам олиш кунлари бўлиб ўтган икки давлат раҳбари ўртасидаги телефон суҳбатида Нетаньяху Эронга қарши яна зарба бериш қарорини ёқлаб чиққан. Трамп эса Теҳрон билан дипломатик музокарани давом эттириш тарафдори эканини билдирган. Манбалар мулоқотни кескин, тортишувга бой, дея таърифлаган.
Бинобарин, Исроил ҳукумати раҳбари идораси ушбу хабарни инкор этиб, “ёлғон ва асоссиз маълумот” деб атаган. Юқори мартабали бир расмий телефон суҳбатини тасдиқлаган, аммо кескинлик кузатилмаганига урғу берган.
Аввалроқ “Financial Times” Нетаньяху Трампга деярли ҳар куни қўнғироқ қилиб, Эронга қарши ҳарбий ҳаракатни яна давом эттиришга ундаётгани ҳақида ёзган эди. “Axios” нашри ҳам Исроил етакчиси АҚШ Конгрессига оралиқ сайловдан кейин зарбаларни тиклаш таклифи билан чиққанини ёзган.
Айни пайт Туркия, Саудия Арабистони, Бирлашган Араб Амирликлари ва Қатар раҳбарлари Вашингтонни ҳарбий ҳаракат эмас, дипломатик музокарага кўпроқ вақт ажратишга чақирган. Трамп ҳам Теҳронга қарши янги ҳарбий амалиёт ўтказилишига қаршилигини маълум қилди. Унинг таъкидлашича, музокарада ижобий силжиш бор, Америка Ислом Республикасига қарши яна ҳужум бошлаши эҳтимоли паст.
Давлат котиби Марко Рубио ҳам 10 ноябрь куни Вашингтон ҳозирча кенг кўламли ҳарбий ҳаракат заруратини кўрмаётганига эътибор қаратди. Яъни, Теҳронга нисбатан иқтисодий босим натижа бермоқда. Фақат Эрон АҚШ белгилаган “қизил чизиқ”дан ўтган тақдирда, Америка жавоб чорасини кўришга тайёр.
Қатар ҳам АҚШ ва Эрон ўртасидаги воситачилик жараёнида ижобий белгилар кузатилаётганини айтди. Шунга қарамай, якуний келишувга эришиш истиқболи ҳозирча ноаниқ.
Кенжа Бекжонов, Салимжон Обиджонов (видео), ЎзА
