Трамп: Россия – Украина низосини ҳал қилишда сезиларли ютуқларга эришилди
– Тинчлик жараёнида сезиларли ютуқларга эришяпмиз, – деди АҚШ Президенти Дональд Трамп журналистларга. Оқ уй раҳбари яқинда Владимир Путин ва Владимир Зеленский билан учрашув кутилаётганини қўшимча қилди. Бинобарин, у бўлғуси уч томонлама музокара юзма-юз кечиши шарт эмаслигига ҳам урғу берди.
Бир кун аввал Россия раҳбари Финляндия Президенти Александр Стубб ва Норвегия Бош вазири Ёнас Гар Стёре билан телефон орқали суҳбатлашди. Улар Ослода яқинда бўлиб ўтган музокара ва Оқ уй махсус элчиси Стив Уиткоффнинг Санкт-Петербургга ташрифини муҳокама қилишди.
Путин ҳамкасбларига Олешкидаги гуманитар амалиёт ва ҳудудда сулҳ эълон қилиниши ҳақида маълумот берди. Унинг таъкидлашича, узоқ муддатли тинчликка фақат Россиянинг қонуний манфаати тўлиқ инобатга олингандагина эришилади.
Ушбу суҳбатдан сўнг Стубб ва Стёре Зеленский билан суҳбатлашди. Бир ҳафта олдин бу уч етакчи Уиткофф ва Жаред Кушнер билан Ослода музокара ўтказган эди.
Эртаси куни Трампнинг махсус вакили Санкт-Петербургда Путин томонидан қабул қилинди. Президент дипломатга РФ АҚШ ва Украина иштирокида уч томонлама маслаҳатлашувни қайта бошлашга тайёрлигини билдирди. Учрашув ноябрь ойи биринчи ярмида БААда бўлиб ўтиши мумкин.
С.Раҳимов, ЎзА
