Трамп: Путин тинчликдан Зеленскийга нисбатан кўпроқ манфаатдор (+видео)
АҚШ Президенти Дональд Трамп Путин Украина билан тинчлик келишувига эришишдан Зеленскийга қараганда кўпроқ манфаатдор, деб ҳисоблайди. Бу фикр журналистлар билан учрашувда билдирилган, деб ёзди DW.
Журналистлардан бири ўзаро ҳужум давом этаётган бир пайт Трамп Путиннинг муросага тайёрлигини нимада кўраётгани билан қизиқди.
«Менимча, улар келишувга эришади. Ҳақиқатан Путин Зеленскийга қараганда келишув тузишдан кўпроқ манфаатдор, деб ўйлайман», — дея жавоб берди Оқ уй раҳбари.
“Энергетика соҳасидаги ўт очишни тўхтатиш келишуви Путин томонидан бузилгани” ҳақидаги саволга жавоб берар экан, Америка етакчиси шундай деди:
– Аввало, вазиятни ўрганиб чиқиш керак, чунки ҳар икки томон келишувни бузган. Путин келишувга эришишни истайди. Зеленскийни ҳам кўнишга ундаш керак.
Аввалроқ Украина Президенти Владимир Зеленский АҚШни Россияга босим ўтказиш ва энергетика соҳасидаги сулҳ режимига амал қилишга ундашга чақирган эди.
Унинг сўзларига кўра, 11 октябрь куни ижтимоий тармоқда Россиянинг Украинага қарши уруши доирасида энергетика объектларига ҳар қандай ҳужум зудлик билан тўхтатилиши тўғрисида хабарлар тарқалгани Киев учун кутилмаган ҳол бўлган.
Зеленский эслатишича, бу баёнот эълон қилинганидан кўп ўтмай, Россия Харьковдаги иссиқлик электр станциясига зарба берган ва мамлакат энергетика тизимига қўшимча зарар етказган.
«Украина энергетика соҳасида ўт очишни тўхтатиш ташаббусини қўллаб-қувватлади. Бизнинг позициямиз мутлақо аниқ: Украина АҚШ Президенти эълон қилганидек, энергетика соҳасида ўт очишни тўхтатишни кафолатлашга тайёр, Россия эса тегишли қадамларни ташлаши керак. Ҳозирча Россия АҚШ Президенти томонидан эълон қилинган шартларни бажараётгани қайд этилмаяпти», — деб ёзди Зеленский 12 октябрь куни ижтимоий тармоқда.
«Деэскалация жараёни самара бериши кўп жиҳатдан айнан АҚШ позициясига боғлиқ. Россияга босим ўтказиш зарур. Америка томони билан музокарани давом эттиряпмиз», — дея қўшимча қилди Украина раҳбари.
Кенжа Бекжонов, Салимжон Обиджонов (видео), ЎзА
