Трамп: Ҳурмуз бўғози очилмаса, Эронга кескин зарба берилади (+видео)
АҚШ президенти Дональд Трамп ижтимоий тармоқда одобсиз иборалар билан ёзилган пост қолдириб, агар Ҳурмуз бўғози очилмаса, Эрондаги электр станциялар ва кўприкларни вайрон қилишини айтди, деб хабар берди ВВС нашри.
Якшанба кечқурун Трамп тушунарсиз пост қолдириб унда ультиматум муддатини яна бир кунга, душанбадан сешанбагача узайтирган бўлиши мумкинлигини англатди. Тушунарсиз дейилишига сабаб, у фақат: «Сешанба, шарқий вақт билан соат 20:00 » - деб ёзган ва нима ҳақида гап кетаётганини маълум қилмаган.
Трампнинг таҳдидларига жавобан, Эрон парламенти спикери Муҳаммад Бағир Ғолибоф АҚШ президентининг “ўйловсиз ҳаракатлари” бутун минтақани ўт ичига қолдиришини айтди.
У X тармоғида шундай ёзди: «Сизнинг қарорларингиз АҚШ ва у ердаги ҳар бир оилага мусибат келтиради. Бизнинг бутун минтақамизни ёндириши мумкин. Чунки, сиз Нетаньяҳу кўрсатмаларини бажаришда давом этяпсиз».
Ғолибоф шунингдек, ягона ечим сифатида Эрон халқи ҳуқуқларини ҳурмат қилиш ва бу хавфли ўйинни тўхтатиш эканини таъкидлади.
Трамп сўзларига кўра, ҳозирги муддат душанбадан сешанбага ўтар кечаси тугайди.
Эрон томонидан Ҳурмуз бўғозининг ёпилиши энергия нархларининг кескин ошишига ва жаҳон иқтисодиётига босим кучайишига олиб келмоқда.
Оман ташқи ишлар вазирлиги маълум қилишича, Эрон ва Оман вакиллари бўғоздан кемаларнинг эркин ўтиши масаласини муҳокама қилган.
Учрашувда мутахассислар ҳам қатнашиб, турли таклифлар билдирилган, аммо якуний натижа маълум қилинмаган.
ВВС нинг халқаро мухбири Орла Гериннинг хабар беришича, энди Эрон ва АҚШ ўртасидаги асосий қарама-қаршилик қуруқликда эмас, балки денгизда давом этиши мумкин. Чунки, бўғоз очилмаса, сешанбадан бошлаб эронликлар олов ичида қолишини Трамп бир неча бор таъкидлаган.
<iframe width="650" height="420" src="https://www.youtube.com/embed/v-xjGgO1qbs" title="Tramp: Hurmuz bo‘g‘ozi ochilmasa, Eronga keskin zarba beriladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Искандар Исматов, ЎзА
