Трамп Эронни иқтисодий қамалга олмоқчи (+видео)
АҚШ президенти Дональд Трамп Эронга қарши мисли кўрилмаган миқёсдаги иқтисодий операция бошланганини маълум қилди. У Теҳронни қўллаб-қувватлаётган давлатларга ҳам оғир иқтисодий чоралар кўрилиши билан таҳдид қилди, деб хабар берди DW нашри
Трамп ўзининг ижтимоий тармоқдаги саҳифасида ёзишича, Эронга АҚШ билан келишувга эришиш имкониятини берган, аммо, унинг айтишича, Эрон бу имкониятдан фойдаланмаган.
«Шунинг учун бугун мен ҳар қандай давлатга қарши қўлланилган энг кучли иқтисодий операцияни бошлаётганимни эълон қиламан. Бу мисли кўрилмаган миқёсдаги иқтисодий уруш ва қамал бўлади», — деб ёзди Трамп.
Трампнинг таъкидлашича, Эроннинг ҳарбий-денгиз кучлари йўқ қилинган, ҳарбий-ҳаво кучлари мағлуб этилган, ҳарбий заводлари вайрон қилинган. Шунингдек, мамлакат миллий валютаси қадрсизланган ва Эрон жуда оғир аҳволга тушиб қолган.
Трамп, шунингдек, Эронга ҳар қандай шаклда ёрдам кўрсатадиган давлатларни огоҳлантирди.
«Эронга молиявий муассасалар, компаниялар, аэропортлар ёки давлат ташкилотлари орқали ёрдам кўрсатишга йўл қўядиган ҳар қандай давлат улкан иқтисодий оқибатларга дуч келади», — деди у.
Унинг айтишича, Эронга нефть контрабандаси, валюта айирбошлаш операциялари, пул ўтказмалари, банклараро молиявий келишувлар ва сохта компаниялар орқали ёрдам бериш дарҳол тўхтатилиши керак.
Трамп Эронни иқтисодий қамал қилиш ва унинг таҳдидларини бартараф этиш учун АҚШнинг барча иттифоқчилари Вашингтон томонида туриши кераклигини таъкидлади.
Унинг фикрича, Эрон ҳозир бурчакка қисиб қўйилган. Трамп бу тарихий иқтисодий чоралар билан Эроннинг дунё бўйлаб террорни тарқатиш қобилиятини фалаж қилишини айтди.
<iframe width="650" height="420" src="https://www.youtube.com/embed/3yiGHA6hhkM" title="Tramp Eronni iqtisodiy qamalga olmoqchi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
