Трамп чақириғидан сўнг Зеленский Россия энергия объектларига зарбани тўхтатиш шартини айтди
Украина Кремль кескинликни камайтиришига қараб Россия нефтни қайта ишлаш заводларига ҳужумни тўхтатади, деб эълон қилди Президент Владимир Зеленский. Унинг таъкидлашича, Киев уруш бошлангандан бери тинчликка интилган ва низони тугатиш учун ўнлаб дипломатик таклиф илгари сурган.
– Қўшма Штатлар билан мулоқот ҳозир ҳам давом этяпти, – деб ёзган у ижтимоий тармоқ саҳифасида. – Биз тинчликни яқинлаштириши мумкин бўлган ғояларни кўриб чиқяпмиз. Бундай саъй-ҳаракат кескинликни камайтиришга қаратилган қатъий қадамлардан бошланади.
Украинанинг энергетика сектори, муҳим инфратузилмаси ва озиқ-овқат экспорти Россия учун нишон бўлиши тўхташи керак. Бу ҳолат бизни кескинликни камайтиришга қаратилган тегишли қадамлар ташлашга ундайди.
АҚШ етакчиси Дональд Трамп Зеленский билан телефонда гаплашиб, РФ НҚИ корхоналарига зарба беришни тўхтатишга чақирган. “Axios” нашри ёзишича, Трамп бундай ҳаракат жаҳон бўйлаб дизель ёнилғиси нархи ошишига олиб келишини айтган.
Зеленский журналистлар билан учрашувда Қўшма Штатлар Украинанинг энергетика соҳасидаги сулҳ таклифини Россияга етказишини айтди. Шунингдек, Америка томони Киевдан РФ НҚИЗларига зарбани бир томонлама тўхтатишни талаб қилмаганига урғу берган.
Бундан ташқари давлат раҳбари “Patriot” ракеталари етказиб бериш Трамп билан муҳокама қилинган асосий мавзулардан бўлгани, бироқ бу борада ҳали аниқ жавоб олинмаганини маълум қилди. Киев Вашингтондан шундай тизим ишлаб чиқариш учун лицензия ҳам сўраган. Унинг сўзларига кўра, “Raytheon” компанияси ушбу лойиҳани амалга оширишга тайёр ва Трамп ҳам бу ғояга ижобий муносабатда. Ишлаб чиқариш тахминан бир-бир ярим йил вақт талаб қилади.
Зеленский Трампдан Си Цзиньпинни тинчлик музокарасига жалб қилишни ҳам сўраб, Хитой раҳбари Путинга таъсир қилиши мумкинлигини тахмин қилган:
– Эртага Президент Трамп Хитой раҳбари билан учрашади. Мен унга очиқ айтдим. Агар музокарага жалб қилинса, Си Цзиньпин Путинга таъсир қила олади.
С.Раҳимов, ЎзА
