Тошкент метрополитенида хавфсизлик чоралари кучайтирилди
Йўловчилар хавфсизлигини таъминлаш мақсадида Тошкент метрополитени Ер усти ҳалқа йўли йўналишида қўшимча профилактик техник текширув ишларини бошлайди.
Шу муносабат билан мазкур йўналишда поездлар ҳаракати вақтинча ўзгартирилади.
Маълум қилинишича, 2026 йил 17–19 июль кунлари Ер усти ҳалқа йўлидаги поездлар ҳар куни соат 06:00 дан 22:30 гача ҳаракатланади.
Ушбу давр мобайнида йўналишдаги 14 та метро бекатининг конструктив ва техник ҳолати мутахассислар томонидан атрофлича кўздан кечирилади. Текширувлар иншоотларнинг мустаҳкамлиги, муҳандислик тизимлари ва эксплуатация хавфсизлигини яна бир бор баҳолашга қаратилган.
Метрополитен мутасаддилари таъкидлашича, профилактик тадбирлар инфратузилманинг ишончли фаолиятини таъминлаш, техник ҳолатни чуқур таҳлил қилиш ҳамда йўловчилар учун янада хавфсиз ва қулай хизмат кўрсатишга қаратилган.
Вақтинчалик ҳаракат жадвалидаги ўзгаришлар муносабати билан йўловчилардан узр сўралди ҳамда сафарларни олдиндан режалаштириш тавсия этилди.
Муҳайё Тошқораева,
ЎзА
