Тошкент – Андижон йўналишида биринчи тезюрар электропоезд қатнови йўлга қўйилди(+видео)

Тошкент–Андижон–Тошкент йўналишида замонавий тезюрар электропоезд қатнови йўлга қўйилди.

Шу муносабат билан “Ўзбекистон темир йўллари” АЖ томонидан оммавий ахборот воситалари вакиллари учун медиатур ташкил этилди. Тадбир давомида темир йўл соҳасида, хусусан, йўловчиларга кўрсатилаётган транспорт хизматлари сифатини янада ошириш борасида амалга оширилаётган ишлар ҳақида маълумот берилди. 

Ўзбекистон Республикаси Президентининг 2025 йил 27 декабрдаги ПҚ-391-сон қарорида темир йўл транспортида йўловчи ташиш фаолиятини ривожлантириш бўйича устувор вазифалар белгилаб берилган. Қарор ижроси доирасида режадаги 6 та юқори тезликда ҳаракатланувчи электропоезднинг 3 таси мамлакатимизга олиб келинди. 

Шу жумладан, Хитойдан олиб келинган 2 та “CRRC-Dalian” тезюрар электропоезднинг бири 9 сентябрдан Хива–Бухоро–Хива йўналишида қатнай бошлади. 10 сентябрдан эса иккинчи электропоезд илк бор Тошкент–Андижон–Тошкент йўналишида йўловчиларга хизмат кўрсатмоқда. 

730/729-сонли электропоезд мазкур йўналишда амалдаги поезд таркиби ўрнига йўлга қўйилди. 730-сонли Тошкент–Андижон поезди ҳар куни соат 09:20 да Тошкент марказий темир йўл вокзалидан ҳаракатланиб, Ангрен, Поп, Қўқон ва Марғилон вокзалларида тўхтайди. Поезд соат 13:35 да Андижонга етиб боради. Сафар давомийлиги 4 соат 15 дақиқани ташкил этади. 

729-сонли Андижон–Тошкент поезди эса ҳар куни соат 15:38 да Андижон вокзалидан жўнайди. У Марғилон, Қўқон, Поп ва Ангрен вокзалларида тўхтаб, соат 19:53 да Тошкент марказий темир йўл вокзалига етиб келади. Замонавий электропоезд 5 та вагондан иборат бўлиб, йўловчилар учун барча зарур қулайликлар билан жиҳозланган.

<iframe width="650" height="420" src="https://www.youtube.com/embed/FC3dJvTglC8" title="TOSHKENTDAN ANDIJONGA YANGI TEZYURAR POYEZD YO‘LGA QO‘YILDI" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Нозимжон Мардонов, ЎзА