Томорқа тўкин, фаровон турмуш манбаи (+видео)
Сурхондарё вилоятининг Ангор туманидаги томорқаларда эрта баҳорда пишиб етилган сервитамин карам, дайкон, пиёз, кўкат, картошка, саримсоқпиёз ва бошқа маҳсулотлар кўзни қувонтиради. Илик узилди давридан мамлакатимиз ва хориж бозорларига тўкинлик, ўзгача файз улашади.
Деҳқончиликда туманнинг, ҳар бир маҳалла ва оиланинг синовдан ўтган ўз усуллари бор. Жумладан, Зартепа маҳалласи аҳолиси ҳам томорқадан унумли фойдаланиш ва чорвачиликни ривожлантиришда бой тажрибага эга. Деҳқончиликка илмий ёндашув ҳосил салмоғини янада оширишга хизмат қилмоқда. Маҳаллада яшайдиган Сабоҳат Муқимова турмуш ўртоғи ва фарзандлари билан беш сотих майдондаги иссиқхонада олти йилдан буён лимон ва бошқа маҳсулотларни парваришлаб, тўкин, фаровон ҳаёт кечирмоқда.
– Лимончиликни 12 та кўчат парвариши билан бошлаб, 75 тупга кўпайтирдик, – дейди Сабоҳат Муқимова. –Ҳозирги кунда “Мир” нави экилган. Афзаллиги ҳосилдорлиги яхши бошқа навларга қараганда. Қатор ораларидан ҳам фойдаланамиз. Кўкат, пиёз, саримсоқпиёз экамиз. Бу йил қулупнай ҳам экдик. Картошка экиляпти. Суғориши – лимон кўпроқ ёмғирни яхши кўради. Баргини кўп юваверсангиз, нафас олиши яхши бўлади. Ёмғирлатиб суғоришни йўлга қўйдик. Лимонларга кунига икки мартадан сув пуркаб оламиз. Даромадимиз яхши. Ўтган мавсумда бир тонна атрофида лимон ҳосили йиғиб олдик.
Ангорликлар жорий йилнинг ўтган уч ойида хориж бозорларига 5 миллион 916 минг долларлик маҳсулот экспорт қилди. Бунда зартепалик соҳибкорларнинг ҳам муносиб улуши бор.
<iframe width="640" height="420" src="https://www.youtube.com/embed/Qj6ReGbRSxY" title="Tomorqa to‘kin, farovon turmush manbai" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Холмўмин Маматрайимов, ЎзА мухбири
