Ташкент пен Абу-Даби арасында жаңа әуе бағыты ашылды
«Etihad Airways» әуе компаниясы өз тарихында алғаш рет Абу-Даби – Ташкент бағыты бойынша тұрақты рейстерді іске қосты.
Жаңа әуе бағытының ашылуына арналған салтанатты рәсімге «Etihad Airways» компаниясының аға вице-президенті Халид Әл Али және Өзбекстанның БАӘ-дегі елшісі Умид Шодиев қатысты.
Тікелей рейстің іске қосылуы екі ел астаналары арасындағы көлік байланысын нығайтып, іскерлік және туристік сапарларды кеңейтуге мүмкіндік береді. Сонымен қатар жолаушылар «Etihad Airways» компаниясының халықаралық әуе желісі арқылы Ташкенттен Абу-Даби арқылы басқа елдерге де сапар шегу мүмкіндігіне ие болады.
«Etihad Airways» компаниясының Өзбекстан нарығына шығуы халықаралық әуе тасымалдаушыларының елге деген қызығушылығы артып келе жатқанын көрсетеді. Бұл өз кезегінде көлік-логистика, туризм және іскерлік байланыстарды дамытуға қосымша мүмкіндіктер ашады.
