Словения НАТО аъзолигидан чиқмоқчи
Словения НАТО аъзолигидан чиқиш масаласини кўриб чиқишга тайёрланмоқда. Мамлакат парламенти бу бўйича референдум ўтказиш ташаббусини эълон қилиб, ташқи сиёсатда мустақил йўл танлаш ниятида.
Ўлка парламенти спикери Зоран Стеванович республиканинг ташқи сиёсий йўналишини тубдан қайта кўриб чиқиш зарурлигини таъкидлаб, Словения ҳарбий ва дипломатик тўқнашувлар майдонига айланмаслиги кераклигини қайд этди.
Унинг айтишича, мамлакат бошқа давлатлар манфаатларига хизмат қилувчи низолардан узоқлашиши шарт, чунки бундай ихтилофларда иштирок этиш Словения учун ижобий натижа бермайди. Шунингдек, у референдум ўтказиш ташаббуси шунчаки сиёсий қадам эмас, балки халқ олдида берилган ваъда эканини ва у албатта амалга оширилишини билдирди.
Экспертлар фикрича, агар ушбу ташаббус амалга ошса, Словения Европада ўз хавфсизлик стратегиясини мустақил белгилайдиган ва ҳарбий блоклардан холи сиёсат юритадиган давлатга айланиши мумкин. Айни пайтда бу масала нафақат мамлакат ичида, балки халқаро ҳамжамиятда ҳам қизғин муҳокамаларга сабаб бўлмоқда.
Ф.Яхшибоева, ЎзА
