СИ хавфи: “Anthropic” раҳбари чақириғини Маск ва Альтман ҳам қўллаб-қувватлади
Миллиардер Илон Маск ва “OpenAI” бош директори Сэм Альтман “Anthropic” бош директори Дарио Амодейнинг сунъий интеллект ривожини секинлаштириш ҳақидаги чақириғини қўллаб-қувватлади. Амодей илгари СИ пойгасини чеклаш учун уч босқичли режа таклиф қилган сиёсий эссе нашр этган. У сўнгги ойларда нейрон тармоғи ривожланиши жараёни назоратдан чиқиб кетиш даражасига етганига амин бўлган.
– Чора кўрилмаса, сунъий интеллект агентлари тўдаси кейинги олти-ўн икки ой ичида “бутун интернетни эгаллаб олиши” мумкин, – деган “Anthropic” бош директори.
Маск ўз хабарида “Дарио ҳақ” деган, Альтман ҳам ташаббусни қўллаб-қувватлаб, ўз компанияси эҳтиёт чораларидан бирини амалга оширишига урғу берди.
СИ соҳасида эришилаётган ютуқлар илм-фан ривожига хизмат қилиб, инсон ҳаётини фаровонлаштирса яхши, албатта. Афсуски, сўнгги пайт бу атама кўпроқ жанг майдонида қўллаш воситасининг муҳим қисми сифатида қабул қилинаётгани СИ ижодкорларида жиддий хавотир уйғотмоқда. Яъни, тараққиёт шундай давом этса, бир кун келиб инсон сунъий онгни бошқара олмай қолиши мумкин экан.
Яқинда оммавий ахборот воситалари “Anthropic” тадқиқотчиси Жейкоб Коксон истеъфога чиқишини ёзди. Ушбу қарор компания ва СИ ишлаб чиқувчилар келажакда бундай қурилмаларни қандай бошқаришни ўйламасдан, ўзини такомиллаштирувчи супер интеллект яратишга шошилаётганидан хавотир туфайли қабул қилинган. Унинг фикрича, ўн йиллик охирига келиб, СИ одамдан ўзиб кетиши, ҳар қандай тизимни буза олиши, бир неча соат ичида илмий ютуққа эришиши, ҳақиқий ресурс ва кучга эгалик қилиши мумкин.
– Раҳбарлар ушбу технология хавфини атай камайтириб кўрсатмоқда, – дейди Коксон. – СИ кучини кам баҳоламанг! Бу тизим тез орада ғайри табиий имкониятга эга бўлиши мумкин.
С.Раҳимов, ЎзА
