ШҲТ Бош котиби Самарқанддаги экспертлик мулоқотида нутқ сўзлади
Самарқандда бўлиб ўтаётган Хавфсизлик масалалари бўйича ШҲТ плюс биринчи экспертлик мулоқотида Шанхай ҳамкорлик ташкилоти Бош котиби Нурлан Ермекбаев нутқ сўзлади.
ШҲТ Бош котиби ўз чиқишида ташкилотнинг 2024 йилда Остона шаҳрида бўлиб ўтган саммитида ушбу форумнинг ўтказилишига оид ташаббусни илгари сургани учун Ўзбекистон Республикаси Президенти Ш.Мирзиёевга миннатдорлик билдирди. Таъкидланганидек, бундай форматдаги ҳамкорлик кенг кўламли инклюзив халқаро шерикликни шакллантиришга хизмат қилади.
ШҲТ Бош котиби Ташкилот ўтган чорак аср ичида турли сиёсий тизимлар, маданий анъаналар ва миллий устуворликларга эга бўлган давлатларни бирлаштирган нуфузли трансминтақавий кўп томонлама тузилмага айланганини қайд этди. Шу билан бирга, давлатларимиз етакчиларининг бир овоздан Марказий Осиё ШҲТнинг ўзаги сифатида эътироф этгани алоҳида таъкидланди.
Минтақавий хавфсизлик учун муҳим аҳамиятга эга бўлган Афғонистонда тинчлик, барқарорлик ва тараққиётни таъминлаш масалаларига алоҳида эътибор қаратилди. «ШҲТ Афғонистоннинг террорчилик, уруш ва гиёҳвандликдан холи бўлган мустақил, бетараф ва тинчликсевар давлат сифатида қарор топиши тарафдори эканини ҳамда ушбу мамлакатда тинчлик, барқарорлик ва тараққиётни таъминлаш бўйича халқаро ҳамжамият томонидан олиб борилаётган саъй-ҳаракатларни қўллаб-қувватлашга тайёрлигини яна бир бор тасдиқлайди», - деди Нурлан Ермекбаев.
ШҲТ Бош котиби 2026 йил сентябр бошида бўлиб ўтган ШҲТга аъзо давлатлар раҳбарларининг Бишкек саммитида қабул қилинган муҳим қарорларга алоҳида тўхталди. Жумладан, ушбу саммитда ШҲТга аъзо давлатларнинг хавфсизлигига таҳдид ва хавф-хатарларга қарши курашиш бўйича Универсал марказ ҳамда ШҲТ Наркотикларга қарши курашиш маркази Ижроия қўмитаси тўғрисидаги низомлар тасдиқланган эди. Шунингдек, 2030 йилгача мўлжалланган гиёҳвандликка, синтетик наркотиклар ва уларнинг прекурсорлари тарқалишига қарши курашиш бўйича дастурлар қабул қилинди.
Сўз якунида Нурлан Ермекбаев ҳамкорликнинг истиқболдаги асосий йўналишларини белгилаб берди. Улар орасида - экспертлар мулоқотини чуқурлаштириш, янги технологик хавф-хатарларга қарши кураш, терроризм, экстремизм, трансмиллий уюшган жиноятчилик, наркотикларнинг ноқонуний айланиши ҳамда жиноий даромадларни легаллаштиришга қарши қўшма чоралар кўламини кенгайтириш, шунингдек, превентив дипломатия ва мулоқот маданиятини мустаҳкамлаш каби масалалар ўрин олган.
ЎзА
