Россиянинг йирик аэропортларида самолётларга ёнилғи қуйиш чекланди (+видео)
Россияда ёнилғи инқирози кучайиши ортидан аэропортларда самолётларга ёнилғи қуйиш бўйича чекловлар оммавий равишда жорий этилмоқда. 7 сентябрь ҳолатига кўра, бундай чоралар мамлакатнинг камида 26 та йирик аэропортида қабул қилинган. Бу ҳақда 10 сентябрь куни аэронавигация ахбороти тизимидаги маълумотларга таяниб Россиянинг “Верстка” нашри хабар қилди.
Журналистларнинг қайд этишича, дастлабки чекловлар июнь ойида жорий этилган, чекловларнинг иккинчи тўлқини эса сентябрь ойига тўғри келган. Уларнинг амал қилиш муддати аэропортга қараб бир ойдан қарийб етти ойгача давом этади.
Самолётларга фақат битта парвоз учун етарли миқдорда ёнилғи қуйилмоқда Бу чоралар Россия ва хорижий авиакомпанияларга бирдек тааллуқли. Шу билан бирга, 26 та аэропортнинг15 тасидаги чекловлар фақат хорижий авиакомпанияларга нисбатан қўлланилмоқда.
Айниқса, Россия жанубида вазият анча оғир. Бу ҳудуддаги айрим аэропортлар Украина билан уруш сабабли ёпилган. Фаолият юритаётган олтита аэропортдан Сочи, Волгоград ва Астрахань аэропортларида ҳам Россия ҳамда хорижий авиакомпаниялар самолётларига ёнилғи қуйиш чекланган.
Россиядаги ёнилғи инқирози Украина дронларининг нефтни қайта ишлаш заводларига берган зарбалари ортидан кучайган. Йил бошидан бери Украина Қуролли кучлари Россиядаги нефтни қайта ишлаш заводларига камида 70 марта зарба берган ва мамлакатда нефтни қайта ишлаш ҳажми пасайиб кетган.
Август ойиохирига келиб Россияда бензин ишлаб чиқариш ҳажми ички истеъмолнинг атиги 70 фоизини ташкил этган, тақчиллик эса кунига 30 минг тоннага етган. Фақат август ойининг ўзида Украина Қуролли кучларининг зарбалари сабабли Россиядаги камида еттита нефтни қайта ишлаш заводи ишлаб чиқаришни тўлиқ ёки қисман тўхтатган. Мамлакатнинг 17 та ҳудудида эса ёнилғи сотувига чекловлар жорий этилган.
<iframe width="650" height="420" src="https://www.youtube.com/embed/Sf0iX1f4lKU" title="Rossiyaning yirik aeroportlarida samolyotlarga yonilg‘i quyish cheklandi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА
