Россия иқтисодиёти сусаймоқда: Сбербанк раҳбари огоҳлантирди (+видео)
Россия иқтисодиётида ўсиш суръатлари ҳаддан ташқари пасайган. Давлат иқтисодий ўсиш ва инвестицияларни қўллаб-қувватлаш сиёсатини кучайтириши керак. Бу фикрни Россиянинг Сбербанк президенти ва бошқарув раиси Герман Греф журналистлар билан суҳбатда билдирди, деб хабар қилди DW нашри.
«Бугун бу ҳолат аллақачон аниқ бўлиб қолди. Албатта, айрим тушунчаларга қандай маъно юклашимизга қараб, атамаларда фарқ бўлиши мумкин. Марказий банк эса вазиятни аста-секин совиш деб баҳоламоқда, биз эса буни иқтисодиётнинг совиши, ҳатто ҳаддан ташқари секинлашиши деб атаймиз. Бугунги рақамлар ҳаммасини кўрсатиб турибди», — деди Греф.
У ўз баҳосини бир нечта иқтисодий кўрсаткичлар билан изоҳлади. Жумладан, 2026 йил ёзида бизнес муҳити индикатори сезиларли ёмонлашган, шунингдек, ишсизлик, истеъмол ва асосий капиталга инвестициялар билан боғлиқ кўрсаткичларда ҳам салбий тенденциялар кузатилган.
Грефнинг таъкидлашича, 2026 йилнинг биринчи ярмида Россия иқтисодиёти атиги 0,6 фоизга ўсган. Бу Марказий банк ҳисоб-китобларига кўра, иқтисодиёт нормал шароитда ўсиши мумкин бўлган 1,5–2 фоизлик кўрсаткичдан анча паст. Унинг фикрича, иқтисодиётдаги вазиятнинг яхшиланиши фақат бозордаги фоиз ставкалари сезиларли пасайгандан кейин бошланиши мумкин.
«Бозордаги фоиз ставкалари меъёрлашиб, 10–12 фоиз оралиғига тушмагунча, вазиятда жиддий бурилишни кўрмаймиз. Бугун, менимча, барча макроиқтисодий шароитларга эътибор қаратиши керак. Бизнесга ёрдам зарур», — деди у.
Шунингдек, иқтисодчилар ҳам рубль келажакда заифроқ бўлади, деган прогнозни билдирмоқда.
<iframe width="650" height="420" src="https://www.youtube.com/embed/qkC5Xjfwkwc" title="Rossiya iqtisodiyoti susaymoqda: Sberbank rahbari ogohlantirdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салимжон Обиджонов, ЎзА
