“Roland Garros”да Камилла Раҳимованинг рақиби аниқ бўлди
Франциянинг Париж шаҳрида теннис бўйича “Катта дубулға” туркумига кирувчи “Roland Garros” турнирида саралаш баҳслари якунланди ва асосий тўрга йўл олган теннисчилар номи аниқ бўлди.
Афсуски, мазкур босқичда мамлакатимиз шарафини ҳимоя қилган Мария Тимофеева ярим финалда, Полина Кудерметова эса саралаш финалида мағлубиятга учраб, яккалик баҳслари билан хайрлашди.
Бироқ мукофот пули 29 миллион 137 минг 500 АҚШ долларини ташкил этувчи “Roland Garros” турнирининг аёллар ўртасидаги асосий тўр баҳсларида мамлакатимизнинг биринчи рақамли теннисчиси Камилла Раҳимова тўғридан-тўғри иштирок этадиган бўлди.
Асосий тўрга ташланган қуръа натижасига кўра, Камилла илк баҳсини руминиялик теннисчи Жаклин Кристианга қарши ўтказади. Учрашув 25 май куни бўлиб ўтади.
Жавоҳир Тошхўжаев, ЎзА
