Қурилиш сифати — хавфсиз ва фаровон ҳаёт гарови
Бугунги кунда мамлакатимизда аҳоли учун муносиб турмуш шароитларини яратиш, замонавий таълим ва тиббиёт муассасаларини барпо этиш, ҳудудларни ободонлаштириш ҳамда қурилиш соҳасида сифат ва хавфсизликни таъминлаш давлат сиёсатидаги муҳим йўналишлардан бирига айланган. Чунки бунёд этилаётган ҳар бир иншоот — шунчаки бино эмас, балки инсонлар ҳаёти, саломатлиги, фарзандлар келажаги ва жамият тараққиёти билан бевосита боғлиқ масаладир.
Давлатимиз раҳбари ташаббуси билан мамлакатимизда шаҳар ва қишлоқларни обод қилиш, ижтимоий инфратузилмани ривожлантириш, аҳолига сифатли таълим ва тиббий хизмат кўрсатиш учун муносиб шароитлар яратишга алоҳида эътибор қаратилмоқда. Бу жараёнда қурилиш ишларининг белгиланган меъёрлар асосида бажарилиши, ажратилаётган маблағлар самарадорлиги ва фойдаланишга топширилаётган объектларнинг ишончлилиги муҳим аҳамият касб этади.
Ана шу вазифалар ижроси доирасида Бухоро вилояти Қурилиш ва уй-жой коммунал хўжалиги соҳасида ҳудудий назорат қилиш инспекцияси томонидан Жондор туманида амалга оширилаётган қурилиш ишлари ҳолати ўрганилди.
Инспекция бошлиғи Сухроб Умаров раҳбарлигида ўтказилган назорат тадбирларида туман ҳудудидаги бир қатор ижтимоий соҳа объектларида қурилиш ишларининг сифати, амалдаги қурилиш меъёрлари ва белгиланган талабларга мувофиқлигига эътибор қаратилди.
Ўрганиш жараёнида “Навгади” маҳалла фуқаролар йиғини ҳудудида жойлашган 11-сонли мактабгача таълим ташкилоти, “Истиқлол” маҳалла фуқаролар йиғинидаги 26-сонли мактабгача таълим ташкилоти ҳамда “Работ” маҳалла фуқаролар йиғини ҳудудида барпо этилаётган оилавий шифокорлик пунктидаги қурилиш ишлари кўздан кечирилди.
Мазкур объектларнинг ҳар бири аҳоли ҳаётида алоҳида ўрин тутади. Мактабгача таълим ташкилотлари болаларнинг илк билим ва кўникмаларни эгаллаши, дунёқараши шаклланиши, уларнинг соғлом ва баркамол вояга етиши учун муҳим маскан ҳисобланади. Оилавий шифокорлик пункти эса аҳолига бирламчи тиббий хизмат кўрсатиш, касалликларнинг олдини олиш ва инсон саломатлигини муҳофаза қилишда муҳим аҳамиятга эга.
Шу боис бундай муассасалар қурилишида сифатга қўйиладиган талаблар оддий техник кўрсаткичлар билангина чекланмайди. Биноларнинг мустаҳкамлиги, қурилиш материалларининг белгиланган талабларга мувофиқлиги, ишларнинг технология асосида бажарилиши ва хавфсизлик меъёрларига риоя этилиши келгусида улардан самарали фойдаланишнинг муҳим шартидир.
Назорат тадбирлари давомида объектларда бажарилаётган ишлар, қурилиш жараёнининг амалдаги меъёрлар ва белгиланган талаблар асосида ташкил этилгани кўздан кечирилди. Шунингдек, қурилиш сифати устидан назоратни таъминлаш, ҳар бир иш босқичида белгиланган талабларга амал қилиш ва ижтимоий объектларнинг ишончлилигини таъминлаш масалаларига алоҳида эътибор қаратилди.
Қурилиш соҳасидаги энг муҳим тамойиллардан бири шуки, сифатни иш якунида текширишнинг ўзи етарли эмас. У пойдевор қўйилган биринчи кундан бошлаб, ҳар бир технологик жараёнда таъминланиши лозим. Чунки қурилиш даврида йўл қўйилган камчиликлар кейинчалик қўшимча харажатлар, таъмирлаш зарурати ва айрим ҳолларда инсонлар хавфсизлиги билан боғлиқ муаммоларни келтириб чиқариши мумкин. Айниқса, болалар таълим оладиган муассасалар ва аҳоли саломатлиги муҳофаза қилинадиган тиббиёт биноларида бу талабнинг аҳамияти янада ортади. Бундай объектлардаги ҳар бир сифат кўрсаткичи ортида инсон тақдири, ота-оналар ишончи ва жамоатчилик манфаати мужассам.
Шу нуқтаи назардан, ҳудудий назорат инспекциясининг жойларда ўрганишлар олиб бориши қурилиш жараёнида масъулиятни ошириш, белгиланган меъёрларга риоя этилишини таъминлаш ва эҳтимолий камчиликларни ўз вақтида аниқлашда муҳим ўрин тутади.
Айни пайтда назоратнинг самараси фақат объектларни кўздан кечириш билан эмас, балки аниқланган камчиликларни бартараф этиш, уларнинг такрорланишига йўл қўймаслик ва ҳар бир масъулнинг ўз вазифасига виждонан ёндашишини таъминлаш билан ҳам белгиланади. Шу маънода, қурилиш сифати учун буюртмачи, лойиҳачи, пудратчи ва техник назорат вакилларининг масъулияти ўзаро уйғун бўлиши зарур.
Жондор туманида ўтказилган мазкур назорат тадбирлари ижтимоий инфратузилма объектларида қурилиш сифати ва белгиланган талабларга риоя этилишига эътибор қаратиш муҳимлигини яна бир бор кўрсатади.
Зеро, янги мактабгача таълим ташкилоти болаларнинг бахтли келажаги учун шароит яратса, замонавий оилавий шифокорлик пункти аҳоли саломатлигини асрашга хизмат қилади. Аммо бу мақсадларга тўлиқ эришиш учун биноларнинг ташқи кўриниши билан бир қаторда, уларнинг мустаҳкамлиги, хавфсизлиги ва фойдаланишга яроқлилиги ҳам кафолатланган бўлиши шарт.
Қурилишда сифатга қўйилган талаб — келажакка қўйилган талабдир. Бугун барпо этилаётган ҳар бир бино йиллар давомида халққа хизмат қилиши, сарфланган маблағлар ўзини оқлаши ва одамлар ишончини қозониши керак.
Шундай экан, қурилиш соҳасида қатъий назорат, масъулият ва сифат тамойилларига изчил амал қилиш обод маҳаллалар, замонавий ижтимоий инфратузилма ва фаровон ҳаётнинг муҳим кафолатларидан бири бўлиб қолади.
Зариф Комилов, ЎзА мухбири
