Peshkuda ziyo taratayotgan taraqqiyot chiroqlari

Bugun Yangi O‘zbekistonda amalga oshirilayotgan islohotlarning haqiqiy mezoni – inson manfaati, xalq farovonligi va hududlarning barqaror taraqqiyotidir. Prezidentimiz tashabbusi bilan hayotga tatbiq etilayotgan davlat dasturlari nafaqat shaharlar, balki eng chekka qishloq va mahallalar qiyofasini ham tubdan o‘zgartirmoqda. Ayniqsa, zamonaviy elektr energetikasi infratuzilmasini yaratish, aholini uzluksiz va sifatli elektr energiyasi bilan ta’minlash masalasi davlat siyosatining eng ustuvor yo‘nalishlaridan biri sifatida belgilab olingani bugun har bir hududda amaliy natijalarini namoyon etmoqda.

Buxoro viloyatining eng chekka hududlaridan biri – Peshku tumanida olib borilayotgan ishlar ana shu ezgu siyosatning yorqin ifodasidir. Elektr energiyasi – bu shunchaki yorug‘lik emas. U ishlab chiqarish quvvati, tadbirkorlik rivoji, ta’lim va tibbiyot muassasalari faoliyati, eng muhimi, har bir xonadonning osoyishta va farovon hayoti demakdir. Shu bois bugun elektr tarmoqlarini yangilashga qaratilgan har bir qurilish ob’ekti ertangi taraqqiyot uchun qo‘yilayotgan mustahkam poydevor sifatida baholanmoqda.

2026-yil davlat dasturlari doirasida Peshku tuman elektr tarmoqlari korxonasi tomonidan keng ko‘lamli qurilish va modernizatsiya ishlari amalga oshirilmoqda. Rejaga muvofiq, tumanda jami 11 ta ob’ektda 19 ta zamonaviy transformator punkti, 30,9 kilometr uzunlikdagi 10/0,4 kilovoltli elektr uzatish tarmoqlari hamda 629 dona temir-beton tayanch qurilishi belgilangan.

E’tiborlisi, bu rejalar qog‘ozda qolib ketmayapti. Qisqa vaqt ichida 15 ta transformator punkti ishga tushirildi, 7,3 kilometr yangi elektr tarmog‘i tortildi, 582 dona mustahkam temir-beton tayanchlar o‘rnatildi. Bu esa rejalashtirilgan ishlar izchil va yuqori sur’atlarda davom etayotganidan dalolat beradi. Qolgan ob’ektlarda ham qurilish-montaj ishlari jadal olib borilmoqda.

Eng muhimi, amalga oshirilayotgan ishlar aholining real ehtiyojlaridan kelib chiqqan holda manzilli tashkil etilmoqda. Jumladan, “Yangi O‘zbekiston qiyofasidagi mahalla” dasturi doirasida 5 ta, “Og‘ir mahallalarni rivojlantirish” dasturi doirasida 4 ta hamda “Og‘ir tumanlar” dasturi asosida yana 6 ta transformator punkti o‘rnatildi. Bu esa davlat dasturlari eng avvalo odamlarni qiynab kelgan muammolarni hal etishga xizmat qilayotganining amaliy isbotidir.

Bugun Peshkuda qad rostlayotgan har bir transformator, tortilayotgan har bir elektr tarmog‘i va o‘rnatilayotgan har bir tayanch ortida minglab insonlarning orzu-umidlari mujassam. Bu ishlar tufayli elektr ta’minotining barqarorligi ta’minlanadi, kuchlanish bilan bog‘liq muammolar kamayadi, tadbirkorlik sub’ektlari uchun yangi imkoniyatlar yaratiladi, yangi uy-joylar va ijtimoiy ob’ektlar ishonchli elektr manbaiga ega bo‘ladi.

Prezidentimiz tomonidan ilgari surilayotgan “Inson qadri uchun” tamoyili bugun ana shunday ezgu ishlarda o‘zining amaliy ifodasini topmoqda. Chunki taraqqiyot avvalo mustahkam infratuzilmadan, zamonaviy muhandislik tarmoqlaridan boshlanadi. Elektr ta’minoti yaxshilangan hududda iqtisodiy faollik ortadi, investitsiyalar jalb etiladi, yangi ishlab chiqarish quvvatlari yaratiladi va eng muhimi, odamlarning hayot sifati yuksaladi.

Peshkuda amalga oshirilayotgan bunyodkorlik ishlari shunchaki raqamlar yoki hisobot emas. Bu — Yangi O‘zbekiston taraqqiyotining hayotiy ifodasi, mamlakatimizda olib borilayotgan xalqparvar siyosatning amaliy natijasi, kelajakka qaratilgan mustahkam investitsiyadir. Bugun barpo etilayotgan elektr infratuzilmasi ertangi taraqqiyotga xizmat qiladi, har bir xonadonga yorug‘lik, har bir oilaga ishonch va farovon kelajak bag‘ishlaydi.

Zarif Komilov, O‘zA muxbiri