Ўзбекистонлик футзалчи Индонезия чемпиони номига мушарраф бўлди
Футзал бўйича Ўзбекистон миллий терма жамоаси аъзоси Элбек Тўлқинов ўз совринлари қаторига Индонезия чемпионати олтин медалини қўшиб қўйди.
2025/2026 йилги мавсумнинг 8-туригача Бухоронинг “Oil Star” жамоаси шарафини ҳимоя қилган Элбек март ойидан Индонезиянинг “Bintang Timur” жамоаси сафига ўтганди.
Индонезиянинг етакчи клубларидан бири саналган “Bintang Timur” мамлакат чемпионатини 3-ўринда якунлаб, плей-офф йўлланмасини қўлга киритди.
Ярим финалда “Bintang Timur” жамоаси “Black Steel Papua” футзалчилари билан рўбарў келди. Шиддатли кечган ўйинда финалчи номи пенальтилар сериясида аниқланди. Унда “Bintang Timur” 5:4 ҳисобида ғалаба қозонди.
Иккинчи ярим финалда эса Элбекнинг укаси Ашир Тўлқинов фаолият юритаётган “Fafage Banua” жамоаси “Cosmo JNE”га икки учрашув натижасига кўра, 2:3 ва 1:2 ҳисобларида мағлуб бўлди.
Шу тариқа чемпионлик “Bintang Timur” ва “Cosmo JNE” жамоалари тўқнашувида ҳал бўлди. Финал ўйинининг ҳар икки учрашувида ҳам тартибли ва ишончли ҳаракатланган “Bintang Timur” футзалчилари Индонезия чемпиони номига мушарраф бўлди.
Ўзбекистон чемпионатининг 2025/2026 йилги мавсумида 31 гол эвазига энг яхши тўпурар номини олган Элбек Тўлқинов ўз совринлари қаторига футзал бўйича Индонезия чемпиони номини ҳам қўшган бўлса, унинг укаси Ашир Тўлқинов мавсумни Индонезия чемпионати бронза медали соҳиби сифатида якунлади.
Т. Рўзиев, ЎзА
