Мамлакатимизнинг халқаро рейтинг ва индекслардаги ўрнини яхшилаш мақсадида изчил ишлар амалга оширилмоқда. Натижада юртимизнинг кўрсаткичлари йилдан-йилга юқорилаётгани кузатилаётир.

Ўзбекистон иқтисодий мураккаблик рейтингида ўз ўрнини сезиларли даражада яхшилади. 

Олий Мажлис Сенатининг Бюджет ва иқтисодий масалалар қўмитаси раиси ўринбосари Қобил Турсунов шу ҳақда сўзлаб берди: 

– Harvard Growth Lab (Гарвард университетининг фанлараро лойиҳаси) таҳлилчилари жорий йилнинг апрель ойида 2023 йил маълумотларини қўшиб, иқтисодий мураккаблик атласини янгилади ҳамда дунёнинг 133 та иқтисодиётини қамраб олган Иқтисодий мураккаблик индекси қиймати бўйича мамлакатлар рейтингини тақдим этди.

Ўзбекистон иқтисодий мураккаблик рейтингида ўз ўрнини сезиларли даражада яхшилаб, сўнгги 5 йил ичида 25 поғонага кўтарилди ва 133 мамлакат орасида 80-ўринни эгаллади.

Рейтингда Ўзбекистон 80-ўринни, Туркия 44-ўринни, Вьетнам 53-ўринни, Қозоғистон 84-ўринни (6 поғона пастлади), Россия 94-ўринни (5 поғона пастлади), Тожикистон 124-ўринни (5 поғона кўтарилди), Туркманистон 126-ўринни (12 поғона пастлади) эгаллади.

Биринчи учликка қуйидаги давлатлар: 1-ўрин – Швейцария, 2-ўрин – Япония, 3-ўрин – Сингапур кирди.

Мамлакатимиз иқтисодиёти барқарор ўсишни намойиш этиб, экспорт йилига ўртача 20,5 фоизга ошмоқда. Бу минтақанинг бошқа мамлакатларидаги ўсиш суръатларидан анча юқори ҳисобланади.

Шу билан бирга, хомашё ресурсларидан ташқари тайёр маҳсулотлар экспорти йилига 21,9 фоизга ўсиб, ўртача жаҳон ўсишидан ўзиб кетди. 5 йил ичида экспортнинг ўсишига ўрта даражада қайта ишланган саноат товарлари энг катта ҳисса қўшмоқда. Хусусан, ишлаб чиқариш мураккаб бўлган маҳсулотлар орасида транспорт воситалари (89 фоиз), саноат ускуналари (77 фоиз), электротехника (59 фоиз) ташкил этиб, юқори ўсиш суръатлари кузатилмоқда.

Ўзбекистон ўзининг экспорт портфелига 67 та янги маҳсулот қўшди ва 2,1 миллиард доллар даромад келтирди. Ушбу кўрсаткич диверсификация ҳамда рақобатбардошликни ошириш бўйича танланган стратегия муваффақиятли эканини тасдиқлайди. Ушбу маҳсулотлар 2023 йилда аҳоли жон бошига 59 доллар даромад келтирди.

Гарвард университетининг фанлараро лойиҳаси ўтказган таҳлилга кўра, Ўзбекистон жаҳон бозорида рақобатбардош устунликларга эга бўлган 162 турдаги маҳсулотга эга. Бу унинг глобал иқтисодиётдаги салоҳиятини яна бир бор намоён этади.

Мамлакатимизда 2033 йилгача иқтисодий ўсиш прогнозлари ишлаб чиқилган. Эътиборлиси, 2033 йилгача мамлакатимиз иқтисодиётининг ўртача йиллик ўсиши 5,6 фоизни ташкил этиши кутилмоқда. Бу ўсиш суръатлари бўйича дунё мамлакатлари ичида иккинчи ўрин ҳисобланади.

Жаҳон иқтисодиётининг кейинги ўн йилликдаги ўртача ўсиш суратлари прогнози Вьетнамда – 3,6 фоизни, Тожикистонда – 4 фоизни, Қирғизистонда – 3,9 фоизни, Грузияда – 3,6 фоизни, Қозоғистонда – 3,6 фоизни, Арманистонда – 3,3 фоизни, Бангладешда – 3 фоизни, Туркманистонда – 2,7 фоизни, Беларусда – 2,4 фоизни, Озарбайжонда – 2,2 фоизни, Россияда - 1,1 фоизни ташкил этмоқда.

Мамлакатимизда қишлоқ хўжалиги каби кам самарали соҳалардан электроника ва машинасозлик каби юқори самарали соҳаларга ресурсларни йўналтириш орқали иқтисодиётни таркибий жиҳатдан ислоҳ қилиш изчил давом эттирилмоқда.

<iframe width="650" height="420" src="https://www.youtube.com/embed/cNSRANtiRhs" title="O‘zbekiston iqtisodiy murakkablik reytingida o‘z o‘rnini sezilarli darajada yaxshiladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Н.Абдураимова, А.Аҳмедов (видео), ЎзА