Ўзбекистон электротехника маҳсулотлари Сурия бозорига етказиб берилди
Ўзбекистон электротехника саноатининг экспорт географияси кенгайиб бормоқда.
Маҳаллий корхоналарда ишлаб чиқарилган маиший техника маҳсулотларининг илк партияси Сурия Араб Республикасининг Ҳалаб шаҳрига етказиб берилди. Бу мамлакат электротехника маҳсулотларининг Яқин Шарқ бозоридаги иштирокини кенгайтириш йўлидаги муҳим қадамлардан биридир.
Жумладан, Ўзбекистонда ишлаб чиқарилган кондиционер, музлаткич ва кир ювиш машиналаридан иборат электротехника маҳсулотлари икки юк автомобилида Сурияга жўнатилди. Маҳсулотларнинг умумий қиймати 90 минг АҚШ долларини ташкил этди.
Юклар Ўзбекистондан Туркманистон, Эрон, Озарбайжон ва Туркия орқали ўтувчи муқобил транзит йўналиши бўйлаб ҳаракатланиб, 20 кунда Ҳалаб шаҳрига етиб борди.
Таъкидлаш жоизки, жорий йилнинг июнь ойида Суриянинг “Kalash Trading” компанияси билан маҳаллий маиший техника ишлаб чиқарувчи “Premier Electronics” корхонаси ўртасида 5 миллион АҚШ долларлик экспорт шартномаси имзоланган эди.
Мазкур шартнома доирасидаги дастлабки маҳсулотларнинг Сурияга етказиб берилиши икки томонлама савдо-иқтисодий алоқаларни амалий мазмун билан бойитмоқда. Шунингдек, бу маҳаллий ишлаб чиқарувчиларнинг янги экспорт бозорларини ўзлаштириш борасидаги салоҳиятини намоён этади.
Сурия йўналишининг ўзлаштирилиши Ўзбекистон электротехника саноати учун янги имкониятлар яратиб, “Made in Uzbekistan” бренди остидаги маҳсулотларнинг Яқин Шарқ бозоридаги иштирокини кенгайтиришга хизмат қилади.
Келгусида экспорт географиясининг кенгайиши, янги ҳамкорлик лойиҳаларининг йўлга қўйилиши ҳамда маҳаллий электротехника маҳсулотларининг хорижий бозорлардаги улушини ошириш кутилмоқда.
Ҳамроз Баёнов, ЎзА
