Ўзбек шахматчисининг яна бир ютуғи
—
Ўзбек гроссмейстери, тезкор шахмат бўйича жаҳон чемпиони, 44-шахмат олимпиадаси ғолиби (мамлакат жамоаси таркибида) Нодирбек Абдусатторов Чехия пойтахти Прагада ўтган “Prague International Chess Festival“ турнирида муддатидан олдин, мусобақа якунланишига бир тур қолганда турнир ғолиблигини қўлга киритди. Бу билан Нодирбекнинг Халқаро шахмат федерациясидаги ўрни янада яхшиланиб, у норасмий шахмат рейтингида 4-ўринга кўтарилди.
Келгусида мураккаб ва оғир кечадиган нуфузли мусобақаларда Нодирбекка омад, вазминлик ва ишончли ғалабалар тилаймиз.
ОРТИНГДА ЎЗБЕКИСТОН
Тезкор шахмат бўйича жаҳон чемпиони, гроссмейстер Нодирбек Абдусатторовга
Элу юртда нодирсан,
Ақли ўткир ботирсан,
Зўр ишларга қодирсан,
Чекинмагил, чемпион,
Ортингда Ўзбекистон!
Майдондаги ҳар “кишт”инг,
Ўзбекона зарб – муштинг,
Жангларда обдон пишдинг,
Бўш келма ҳеч, чемпион,
Ортингда Ўзбекистон!
Қатор тизиб аскарни,
Олдга ташла лашкарни,
Айланиб ўт хатарни,
Мардона бўл, чемпион,
Ортингда Ўзбекистон!
Боболарнинг нақли бу,
Аждодларнинг ақли бу,
Келажакнинг ёлқини,
Сен – Ёшликсан, чемпион,
Ортингда Ўзбекистон!
Қанот бўлсин тафаккур,
Етти ўйлаб... дона сур,
Рақиб мотми? Ташаккур!
Сафда илғор, чемпион,
Ортингда Ўзбекистон!
Фикринг – ўткир чақмоқдек,
Қалбинг – қайнар булоқдек,
Сурсанг – донанг тўқмоқдек,
Йўл, тадбир топ, чемпион,
Ортингда Ўзбекистон!
Кўрсат ўзбекнинг кучин,
Олгин тарихлар ўчин,
Онажон – Ватан учун
Зафар қучгин, чемпион,
Ортингда Ўзбекистон!
Сен ҳам юрт посбонисан,
Миллатнинг ўғлонисан,
Замон қаҳрамонисан!
Ғолиб бўлгин, чемпион,
Ортингда Ўзбекистон!
Салим АШУР
