Ўқ отиш спорти: жаҳон чемпионатида тарихий соврин қўлга киритилди
Қатар пойтахти Доҳа шаҳрида ўқ отиш бўйича ўтказилаётган жаҳон чемпионатида мамлакатимиз вакиллари совринли ўринни эгаллади.
Чемпионатнинг эркаклар ўртасида 10 метрдан пневматик тўппончадан отиш бўйича жамоавий дастурда иштирок этган ҳамюртларимиз Владимир Свечников, Содиқжон Абдуллаев ва Муҳаммад Камалов финал баҳсида 1738 очко билан бронза медалига сазовор бўлди.
Дунё биринчилигининг мазкур йўналишида кумуш медални қўлга киритган Жанубий Корея жамоаси ҳам ҳамюртларимиз сингари 1738 очко жамғарган эди. Бироқ, қўшимча кўрсаткичлар эвазига кореяликлар шоҳсупанинг иккинчи поғонасига кўтарилди. Жаҳон чемпионлиги 1755 очко жамғарган Хитой жамоасига насиб этди.
Эътиборли жиҳати, ушбу медаль мамлакатимиз мерганларининг жаҳон чемпионатлари тарихидаги илк соврини экани билан аҳамиятлидир.
Тўлқин Рўзиев,
ЎзА
