Нобель мукофоти совриндори Азиз Санжар Озарбайжоннинг "Шуҳрат" ордени билан тақдирланди
Президент Илҳом Алиев турк фарзанди, Нобель мукофоти совриндори профессор доктор Азиз Санжарни мамлакатнинг "Шуҳрат" ордени билан тақдирлади. Ушбу мукофот олимга Озарбайжон Республикаси билан халқаро илмий ва гуманитар ҳамкорликни мустаҳкамлашдаги алоҳида хизматлари учун берилди.
Жаҳон илм-фанида муносиб ўрин эгаллаган Азиз Санжар ДНКнинг зарарланган қисмларини тиклаш механизмини тадқиқ этиш борасидаги фундаментал ишлари билан танилган. 2015 йил америкалик Пол Модрич ва швециялик Томас Линдал билан бирга кимё бўйича Нобель мукофотини қўлга киритган. Мазкур нуфузли мукофот ДНКни тиклаш механизмини молекуляр даражада ўрганишдаги фундаментал тадқиқот учун берилган.
Азиз Санжар 1946 йил 8 сентябрь куни Туркиянинг Мардин вилояти Савур шаҳрида туғилган. Истанбул университети Тиббиёт факультетини 1969 йил тамомлаган. Шундан сўнг бир муддат шифокор бўлиб ишлаган ва кейин илмий фаолиятни давом эттириш учун АҚШга жўнаб кетган. Техас университетининг Далласдаги тиббиёт мактабида молекуляр биология бўйича таҳсил олиб, 1977 йил доктор даражасини олган. Илмий фаолиятини уммон ортида давом эттирган мутахассис ДНК репарацияси, ҳужайра цикли ва биологик соат механизми бўйича тадқиқот олиб борган. Унинг илмий мероси бутун дунё учун чексиз ғурур манбаи сифатида эътироф этилади.
Азиз Санжарнинг Озарбайжон билан алоқаси нафақат илм-фан, балки маданий-гуманитар муносабатни ҳам қамраб олган. У 2021 йил Бокуда муҳим тадбирларда иштирок этган. 2021 йил Шуша шаҳрига ташриф буюриб, тарихий ҳудудларни зиёрат этиши мамлакатда алоҳида қизиқиш билан қабул қилинган. “Шуҳрат” ордени эса олимнинг 80 ёшлик юбилейи арафасида берилгани аҳамиятли.
Нодира Қаюмова, ЎзА
