Нетаньяху Ғазодан чекинишни рад этди
Ғазода урушни тўхтатиш бўйича Қўшма Штатлар таклиф қилган янги ташаббус Исроил ҳукумати қаршилигига дуч келди. ҲАМАС июль охирида Дональд Трампнинг “Тинчлик кенгаши” тақдим этган 15 банддан иборат ҳужжатни қабул қилди, аммо Биньямин Нетаньяху ташаббусни рад этди. Исроил Бош вазири ҲАМАС тўлиқ қуролсизлантирилмагунча, армия Ғазодан чиқмаслигини билдирди. Шу тариқа Вашингтон урушнинг иккинчи босқичини бошлаш учун илгари сурган лойиҳа яна ноаниқ ҳолатга тушди.
Келишмовчиликнинг асосий нуқтаси – Исроил қўшини Ғазодан чиқиши шарти. Трамп режасига кўра, ҳарбийлар ҲАМАСни қуролсизлантириш жараёни билан бир вақтда босқичма-босқич чекиниши керак эди. Нетаньяху эса бундай тартибни қабул қилмай, барча қуроллар топширилмагунча ҳарбийлар ҳудудни тарк этмаслигини айтди. Унинг таъкидлашича, гап фақат расмий баёнот эмас, “ҳақиқий қуролсизланиш” ҳақида кетмоқда.
Бундай ёндашув Трамп билан Нетаньяху ўртасидаги сўнгги келишмовчиликни яна очиқ кўрсатди. Исроил раҳбари Америка раҳбарини “Оқ уйдаги энг буюк дўстимиз” деб атаган бўлса-да, таклифнинг айрим шартлари қабул қилинмаслигини билдирди. ҲАМАС сиёсий бюроси аъзоси Бассам Наим эса воситачилар ва АҚШни Исроил ҳукуматини жараёнга тўсқинлик қилмасликка ундашга чақирди. Унинг айтишича, ички сиёсий ва сайлов манфаати келишувни бузишга сабаб бўлмаслиги керак.
Нетаньяху қарор қабул қилаётган пайтда ички босим ҳам кучайган. Ўнг қанот тарафдорлари Ғазо бўйича ташаббусни танқид қилмоқда, ўта ўнг вакиллар эса лойиҳани бекор қилиш учун сайлов ўтказишга чақирмоқда. Бош вазир 27 октябрдаги сайлов олдидан айрим сўровларда рақиблари билан деярли тенг натижа қайд этмоқда ёки ортда қоляпти. Энди Ғазода тинчлик ўрнатиш масаласи ҳарбий шарт билан бир қаторда Исроилдаги ички сиёсий курашга ҳам боғланиб қолди.
Мусулмон Зиё, ЎзА
