“Namangan Grand Prix”: Кучли велоспортчилар сараланди
Наманган шаҳрида велоспортнинг трек йўналиши бўйича ўтган “Namangan Grand Prix” халқаро мусобақасида турли йўналишларда ғолиб ва совриндорлар аниқланди.
Ҳусусан, “Madison” йўналишида аёллар ўртасидаги баҳсларда Нафосат Козиева ва Мадина Қаҳҳорова жуфтлиги биринчи ўринни эгаллади. Иккинчи поғонадан Қозоғистон миллий терма жамоаси вакиллари Милана Котельникова ҳамда Ангелина Буренкова жой олган бўлса, Самира Исмоилова ва Асал Ризаева (Tashkent city cycling team) бронза медалини қўлга киритди.
[gallery-29343]
Эркаклар ўртасида эса Ҳиндистон миллий терма жамоаси вакиллари Вишавжит Сингҳ ҳамда Ҳаршвеер Секхон ғолибликни қўлга киритди. Ўзбекистон миллий терма жамоаси аъзолари Алимардон Жамолиддинов ва Муҳриддин Сапаров кумуш медалга сазовор бўлди. Яна бир ҳиндистонлик жуфтлик — Динеш Кумар ва Наман Капил учинчи ўринни банд этди.
“Point Race” баҳсларида эркаклар ўртасида Ўзбекистон миллий терма жамоаси вакили Сергей Ростовцев 101 очко билан ғолиб бўлди. Ҳиндистонлик Вишавжит Сингҳ 95 очко билан иккинчи, Ҳаршвеер Секхон эса 82 очко билан учинчи ўринни эгаллади.
Аёллар ўртасидаги “Point Race” баҳсларида нейтрал мақомдаги Палина Конрад 74 очко билан олтин, Нафосат Козиева 57 очко тўплаб кумуш, Алина Короткина эса 21 очко жамғариб, бронза медалини қўлга киритди.
“Elimination” йўналишида аёллар ўртасида Палина Конрад ғолиб деб топилди. Нафосат Козиева ва Аделина Сакун кучли учликни якунлаб берган бўлса, эркаклар баҳсида Сергей Ростовцев, Дмитрий Бочаров ва Ҳаршвеер Секхон шоҳсупага кўтарилди.
Жавоҳир Тошхўжаев,
ЎзА
