Мемлекет басшысы Ташкент қаласындағы махалланың жаңғырту жұмыстарымен танысты
Президент Шавкат Мирзиёев Ташкент қаласының «Сергели» ауданындағы махаллада жүзеге асырылған абаттандыру жұмыстары және жерүсті метро желісінің астында ұйымдастырылған сауда мен қызмет көрсету нысандарының қызметімен танысты.
Адам қадір-қасиетін ардақтау және халықтың әл-ауқатын арттыруға бағытталған жүйелі реформалардың нәтижесі бүгінде махаллалардың келбеті мен тұрғындардың күнделікті тұрмысынан айқын байқалады.
«Узгариш» махалласы осы оң өзгерістердің жарқын үлгісіне айналған. Аумағында 45 көпқабатты тұрғын үй, 1 620 пәтер бар. Мұнда 6 700-ден астам тұрғын өмір сүреді.
Махаллада жылдар бойы қордаланған мәселелер кезең-кезеңімен шешіліп, заманауи инфрақұрылым мен қолайлы әлеуметтік орта қалыптастырылған. Атап айтқанда, 10 балалар ойын алаңы, шағын футбол алаңы және екі сауықтыру аймағы салынды.
Мемлекет басшысы махаллада іске қосылған заманауи когенерациялық орталықтың жұмысымен де танысты.
Айтылғандай, бұл орталық күзгі-қысқы маусымда махалланы жылу және электр энергиясымен тұрақты қамтамасыз етуге мүмкіндік береді. Когенерация технологиясы бойынша табиғи газдан алдымен электр энергиясы өндіріледі, кейін бөлінген жылу тұрғын үйлер мен су жылыту жүйесіне пайдаланылады. Бұл энергия тиімділігін арттырып, шығынды азайтады.
Жобаның жалпы құны 5,8 миллион АҚШ долларын құрайды. Орталыққа Германияда өндірілген заманауи газ-поршеньді қондырғылар мен қазандықтар орнатылған. Оның жылдық өндірістік қуаты 18,4 миллион киловатт-сағат электр энергиясын және 80 мың гигакалория жылу энергиясын өндіруге жетеді.
Жоба аясында ұзындығы 2 шақырым болатын жоғары кернеулі электр желісі салынып, жалпы электр желісіне қосылды. Нәтижесінде ауданның орталық электр желісіне түсетін жүктеме 3 пайызға азайды. Орталық іске қосылғаннан кейін 10 тұрақты жұмыс орны ашылды.
Сонымен қатар, махалланың инфрақұрылымы да толық жаңартылды. Ұзындығы 1,4 шақырым жаяу жүргіншілер жолы салынды, 12 көпқабатты тұрғын үйдің қасбеті жөнделіп, ішкі көшелерге асфальт төселді. Аумақты көгалдандыру мақсатында 2 720 сәндік ағаш пен бұта көшеті отырғызылды.
Мемлекет басшысы «махалла жетілігінің» мүшелері және жергілікті белсенділермен жүздесті. Кездесу барысында атқарылған жұмыстардың тұрғындарға қолайлы тұрмыс жағдайын жасап, махалланы көркейген әрі қауіпсіз мекенге айналдыруға бағытталғаны атап өтілді.
– Кең ауқымды жаңғырту жұмыстарын дәл осы «Сергели» ауданынан бастаған едік. Кезінде бұл ауданға заманауи метро желісін тарту туралы бастама көтергенімізде, осы ірі жобаның болашағына күмәнмен қарағандар да болды.
Алайда бүгінде осындай көрікті әрі абаттандырылған ортаны, ең бастысы, сіздер сияқты отандастарымыздың көзінен қуаныш көріп, таңдаған бағытымыздың дұрыстығына тағы бір мәрте көз жеткізіп отырмыз.
Бүгінгі сапарымыздың мақсаты – сіздермен тікелей жүздесіп, ұсыныс-пікірлеріңізді тыңдау, – деді Мемлекет басшысы.
Сондай-ақ Президент осы ауданы арқылы өтетін жерүсті метро желісінің астында орналасқан сауда және қызмет көрсету нысандарының жұмысымен танысты.
Заманауи қала құрылысы тәжірибесінде қолданыстағы инфрақұрылымды тиімді пайдалану және бос кеңістіктерді тұрғындарға қолайлы әрі экономикаға пайдалы орындарға айналдырудың маңызы зор. Осы мақсатта жерүсті метро желісінің астындағы 5,7 гектар аумақ толық жаңғыртылды.
Мұнда 137 кәсіпкерлік нысаны ашылып, 250 жаңа жұмыс орны құрылды. Метро желісінің астында ұзындығы 4 шақырым жаяу жүргіншілер және велосипед жолдары, екі балалар ойын алаңы мен спорт алаңдары салынды. Тұрғындардың демалысына қолайлы жағдай жасау үшін 100 орындық пен 40 заманауи сәндік жарық шамы орнатылды.
