Махсус комиссия: Тошкентда бошланган чоралардан сўнг ҳаво сифати яхшилана бошлади
Президент фармонига кўра, Тошкeнт шаҳрида экологик вазиятни яхшилаш юзасидан кeчиктириб бўлмайдиган чора-тадбирларни амалга ошириш бўйича Махсус комиссия тузилган эди. Айни кунларда ушбу комиссия ҳаво сифатини яхшилаш юзасидан амалий чора-тадбирларни изчиллик билан олиб бормоқда.
Бу бўйича брифинглар ташкил этилиб, Ўзбекистон Республикаси Президентининг экология масалалари бўйича маслаҳатчиси – Экология ва иқлим ўзгариши миллий қўмитаси раиси, Махсус комиссия раҳбари Азиз Абдуҳакимов олиб борилаётган ишлар ва натижалар хусусида маълумотлар тақдим этиб бормоқда.
Маълум қилинганидек, экологик вазиятни яхшилаш бўйича кечиктириб бўлмайдиган чора-тадбирлар бошлангандан буён қисқа вақт ичида натижа сезила бошланди. Махсус комиссия тузилиши, кенг кўламдаги рейдлар, Тошкент шаҳрида бошланган чоралардан сўнг ҳаво сифати яхши томонга ўзгарди.
Навбатдаги брифингда А.Абдуҳакимов Тошкент кенг кўламли урбанизация жараёнини бошдан кечираётганини қайд этиб, қуйидагиларни маълум қилди:
— Ўзбекистон ҳозирги кунда юқори суръатларда ривожланиб бормоқда. ЯИМнинг ўртача йиллик ўсиши 6-7 фоизни ташкил этмоқда. Тошкент шаҳри эса кенг кўламли урбанизация жараёнини бошдан кечирмоқда. Мисол учун, агар 1991-2016 йилларда ҳар йили ўртача 2 минг 200 та квартира қурилган бўлса, 2017-2023 йилларда бу кўрсаткич 15 минг 800 тага етди.
Пойтахтда автомобиллар сони ҳам кескин ўсмоқда. Бу кўрсаткич 2020 йилги 417 мингдан бугунги кунда 624 минггача кўпайган, — деди Махсус комиссия раҳбари.
Атмосфера сифатини яхшилаш юзасидан амалий чора-тадбирлар қатъий давом эттирилмоқда.
Муҳтарама Комилова,
ЎзА
