Матонатли пауэрлифтингчиларимиз қитъа чемпионатининг илк кунида 4 та медалли бўлди
Таиланд пойтахти Бангкок шаҳрида пара пауэрлифтинг бўйича ёшлар ва катталар ўртасида ўтаётган навбатдаги Осиё-Океания чемпионатининг илк кунида матонатли пара спортчиларимиз 4 та медалга эга чиқди.
28 та мамлакатнинг 250 нафарга яқин матонатли спортчилари иштирокида кечаётган биринчиликнинг дастлабки кунги баҳсларида терма жамоамиз аъзоларидан Баҳриддин Холбўтаев ёшлар ўртасида -54 килограмм вазнда 121 кило тошни бўйсундириб олтин, тотал йўналишида 237 кг. кўрсаткич билан бронза медалига эга чиқди.
Шунингдек, ёш спортчиларимиздан Абдуллоҳ Абдулазизов -49 килограмм вазннинг бест йўналишида 139 кг. ҳамда тотал йўналишида 404 кг. натижа қайд этган ҳолда 2 та кумуш медални қўлга киритди.
Эслатиб ўтамиз, 13 апрелга қадар давом этадиган чемпионатда Ўзбекистон терма жамоасининг 36 нафар аъзоси иштирок этмоқда.
Т.Рўзиев,
ЎзА
