“Маърифат ҳафталиги” тадбирлари давом этмоқда

Бугунги глобаллашув даврида миллий ўзликни англаш, маънавий қадриятларни асраб-авайлаш, ёш авлодни соғлом дунёқараш ва мустақил фикр асосида тарбиялаш тобора муҳим аҳамият касб этмоқда. Зеро, мамлакат тараққиёти фақат иқтисодий кўрсаткичлар ёки бунёд этилаётган иншоотлар билан эмас, аввало, жамиятнинг маънавий салоҳияти, инсонларнинг билим ва тафаккури, юрт тақдирига дахлдорлик ҳисси билан ҳам белгиланади.

Айни шу мақсадларга хизмат қилаётган “Ўзбекистон — ўз-ўзимизники!” шиори остидаги “Маърифат ҳафталиги” ижтимоий-маърифий лойиҳаси Бухоро вилоятида кенг қамровда ўтказилмоқда. Уч кун давомида Бухоро шаҳри, Қоракўл ва Олот туманларида таниқли олимлар, зиёлилар, ижодкорлар, санъаткорлар ҳамда кенг жамоатчилик вакиллари иштирокида маънавий-маърифий тадбирлар, очиқ мулоқотлар, ижодий учрашувлар, семинарлар ва эзгу ташаббуслар амалга оширилмоқда.

Республика Маънавият ва маърифат маркази, “Маърифат” тарғиботчилар жамияти ҳамда ҳамкор ташкилотлар иштирокида ташкил этилган ҳафталикнинг бош ғояси — юрт тақдирига дахлдорлик, миллий қадриятларга садоқат ва бунёдкорлик масъулиятини ҳар бир инсон қалбига сингдиришдан иборат.

Айниқса, “Ўзбекистон — ўз-ўзимизники!” деган ғоянинг мазмун-моҳияти ҳар бир фуқаронинг Ватан равнақига қўшадиган ҳиссаси, ислоҳотларга муносабати ва жамият олдидаги масъулияти билан чамбарчас боғлиқ. Бу шиор шунчаки баландпарвоз чақириқ эмас, балки юртни асраш, унинг келажагига бефарқ бўлмаслик ва тараққиёт учун шахсий масъулиятни ҳис этишга даъватдир.

Қоракўл туманида ҳафталик доирасида “Маҳалла билан юзма-юз”, “Маърифат соати”, “Оила — муқаддас даргоҳ” ва “Истеъдодлар давраси” лойиҳалари асосида учрашувлар ташкил этилди. Уларда миллий қадриятлар, оилавий муносабатлар, ёшлар тарбияси, мамлакатимизда амалга оширилаётган ислоҳотларнинг мазмун-моҳияти ҳамда жамиятда ижтимоий бирдамликни мустаҳкамлаш масалалари муҳокама қилинди.

Олот туманида ҳам ҳафталик тадбирлари мазмунан бой ва турли йўналишларни қамраб олгани билан аҳамиятли бўлди. Жумладан, “Шайхлар” маҳалла фуқаролар йиғинида “Яшил макон” умуммиллий лойиҳаси доирасида “Маърифат” боғини барпо этишга қаратилган экологик акция ўтказилди. Бу ташаббус маърифат ва ободлик тушунчаларининг ўзаро уйғунлигини намоён этди. Зеро, инсоннинг табиатга муносабати, атроф-муҳитни асраш маданияти ҳам унинг маънавий камолоти ва фуқаролик масъулиятининг муҳим кўрсаткичидир.

Туман Маданият марказида ўтказилган “Истеъдодлар давраси” лойиҳаси эса таниқли санъаткорлар билан ёш ижодкорларни бир даврага жамлади. Ижодий мулоқотлар, маҳорат дарслари, бадиий чиқишлар ва фикр алмашувлар орқали ёшларнинг санъатга қизиқишини ошириш, иқтидорини намоён этиш ва ижодий изланишларини қўллаб-қувватлаш масалаларига эътибор қаратилди.

Таниқли санъаткорлар ўз ҳаётий ва ижодий тажрибалари билан ўртоқлашиб, санъат йўлида изланиш, тинимсиз меҳнат ва изчилликнинг аҳамиятини таъкидладилар. Бундай учрашувларнинг қадри шундаки, улар ёшларга нафақат касбий тажриба, балки ҳаётий сабоқ ҳам беради. Устоз-шогирд анъаналарини давом эттириш, янги истеъдодларни кашф этиш ва миллий санъатимизга меҳр уйғотиш эса маданий муҳитнинг янада юксалишига хизмат қилади.

Ҳафталикнинг яна бир муҳим йўналиши оила институтини мустаҳкамлаш ва ёшлар маънавий хавфсизлигини таъминлашга қаратилди. Хусусан, Олот туманида ташкил этилган “Уйғоқ идрок” лойиҳасида оилавий қадриятлар, соғлом диний дунёқараш, ёшларни ёт ғоялар таъсиридан ҳимоя қилиш, оилавий ажримларнинг олдини олиш, шунингдек, оилада отанинг ўрни ва масъулияти каби долзарб масалалар атрофлича муҳокама қилинди.

Мулоқотларда оиланинг жамият ҳаётидаги ўрни, фарзанд тарбиясида ота-онанинг шахсий намунаси, ўзаро ҳурмат ва ишончнинг аҳамиятига алоҳида урғу берилди. Зеро, ҳар бир оиладаги соғлом муҳит жамият барқарорлигининг муҳим асосидир. Оилани асраш эса фақат бир томоннинг эмас, балки барча оила аъзоларининг ўзаро ҳурмати, меҳр-оқибати ва масъулиятини талаб этади.

Шунингдек, “Маърифат ҳафталиги” доирасидаги “Ислоҳотлар — тараққиёт пойдевори” лойиҳаси ҳам эътиборга молик бўлди. Унда Янги Ўзбекистонда амалга оширилаётган кенг кўламли ўзгаришлар, уларнинг мазмун-моҳияти, жамият ҳаётидаги аҳамияти ва ҳар бир фуқаронинг бу жараёнлардаги иштироки юзасидан фикр алмашилди.

Мулоқотларда тараққиётнинг муҳим шарти билимли, ташаббускор, замонавий фикрлайдиган ва ўз масъулиятини чуқур англайдиган авлодни тарбиялаш экани таъкидланди. Бу жараёнда онанинг ўрни, оиладаги тарбия муҳити ва ота-онанинг маърифий савиясига алоҳида эътибор қаратилди. Фарзанд тарбияси фақат меҳр кўрсатиш билан чекланмаслиги, балки билим, сабр, педагогик ёндашув ва шахсий намунага ҳам таяниши зарурлиги қайд этилди. Зеро, фарзандининг келажаги учун қайғурадиган ота-она, аввало, ўзининг ҳам билим ва дунёқарашини бойитиб бориши лозим.

Дарҳақиқат, ислоҳотларнинг асл самараси инсонлар ҳаётида, уларнинг дунёқараши, билим даражаси ва жамиятдаги фаоллигида намоён бўлади. Бунёд этилаётган замонавий иншоотлар, яратилаётган иқтисодий имкониятлар ва кенг кўламли дастурлар, энг аввало, маърифатли, ташаббускор ва фаол фуқаролар салоҳияти билан тўлақонли натижа беради.

Шу маънода, “Маърифат ҳафталиги” доирасидаги тадбирлар оддий учрашув ва тарғибот ишларидан кўра кенгроқ мазмунга эга. Уларда оиладан маҳаллагача, таълим-тарбиядан санъат ва экологиягача бўлган муҳим йўналишлар қамраб олиниб, инсон омили, маънавий масъулият ва фуқаролик дахлдорлиги ягона мақсад атрофида бирлаштирилмоқда.

Зеро, Янги Ўзбекистоннинг келажаги, аввало, илмли, кенг тафаккурли, мустақил фикрлайдиган ва Ватан тақдирига бефарқ бўлмаган авлод қўлида. “Ўзбекистон — ўз-ўзимизники!” деган ғоянинг ҳаётий мазмуни ҳам шунда: юрт тараққиётини кутиш эмас, унга ҳар биримиз ўз билимимиз, меҳнатимиз ва ташаббусимиз билан ҳисса қўшишимиз керак. Ана шундай дахлдорлик туйғуси мустаҳкам бўлган жамиятгина эзгу мақсадлар сари дадил одимлайди.

Бухорода ҳафталик доирасида тадбирлар давом этмоқда.

Зариф Комилов, ЎзА мухбири