Камилла Раҳимова «US Open-2026»ни ғалаба билан бошлади
«US Open-2026» турнирида Ўзбекистоннинг биринчи рақамли теннисчиси илк даврада ғалаба қозонди. Нуфузли мусобақада унинг навбатдаги рақиби ким бўлади?
Америка Қўшма Штатларининг Нью-Йорк шаҳрида теннис бўйича «Катта дубулға» туркумига кирувчи «US Open-2026» турнирининг аёллар ўртасидаги яккалик баҳсларида асосий тўрнинг биринчи давра учрашувлари бошланди.
Мусобақанинг ушбу босқичида мамлакатимизнинг биринчи рақамли теннисчиси Камилла Раҳимова чехиялик Барбора Крейчиковага қарши кортга чиқиб, 7:6, 6:4 ҳисобида ғалаба қозонди. Энди Камилла Раҳимова иккинчи даврада испаниялик Оксана Селехметева ва япониялик Аои Ито ўртасидаги учрашув ғолиби билан куч синашади.
Эслатиб ўтамиз, мукофот жамғармаси 108 миллион АҚШ долларини ташкил этувчи мусобақанинг яккалик баҳсларида яна бир вакилимиз Мария Тимофеева ҳам иштирок этмоқда. У биринчи даврада словениялик Тамара Зиданшекка қарши кортга чиқади.
Жавоҳир Тошхўжаев, ЎзА
