Жиззах — Шимолий Македония: фармацевтика соҳасида янги истиқболлар
Президент топшириқлари амалда
Бугунги кунда Шимолий Македония Ўзбекистон фармацевтика саноатида истиқболли ҳамкор сифатида намоён бўлмоқда.
Жиззах вилоятида бўлиб ўтган учрашув — фақат расмий мулоқот эмас, балки Президент Шавкат Мирзиёев томонидан белгиланган фармацевтика соҳасини ривожлантириш бўйича устувор вазифалар ижросидаги илк амалий қадам сифатида ҳам аҳамиятлидир. Ушбу топшириқлар доирасида 25 гектар майдонга эга Жиззах фармзонасида ўтган йили дори ишлаб чиқарилмагани сабабли муаммолар аниқланиб, мутасаддилар зиммасига уларни бартараф этиш вазифаси юкланган эди.
Вилоят ҳокимининг биринчи ўринбосари Зафар Азимов томонидан Шимолий Македониянинг нуфузли “Alkaloid AD Skopje” фармацевтика компанияси вакиллари билан ўтказилган музокаралар айнан шу топшириқларнинг ижросини таъминлашга қаратилган ҳамкорликнинг дастлабки намунаси бўлди.
Учрашувда Жиззах вилоятининг инвестициявий имкониятлари кенг қамровда тақдим этилди. Тадбиркорлик ва хорижий сармоядорлар учун яратилган қулай шарт-шароитлар, солиқ ва божхона имтиёзлари, ривожланаётган инфратузилма — барчаси фармацевтика лойиҳаларини самарали амалга ошириш учун асос сифатида хизмат қилди.
Айниқса, Зомин туманида ташкил этилган “Зомин Фарм” эркин иқтисодий зонаси фармацевтика соҳасида ихтисослашган платформа сифатида алоҳида аҳамият касб этди. Тайёр инфратузилма, логистика имкониятлари ва давлат қўллаб-қувватлови хорижий инвесторлар учун ишончли ва аниқ таклиф сифатида кўрсатилди.
— Биз вилоятимизда халқаро ҳамкорликни кенгайтиришга алоҳида эътибор қаратмоқдамиз, — дейди Зафар Азимов. — Президент топшириқларига мувофиқ, фармацевтика соҳасини ривожлантиришда илғор технология ва инвестицияларни жалб этиш орқали юқори қўшимча қийматга эга маҳсулотлар ишлаб чиқариш йўлга қўйилмоқда.
Музокараларда иштирок этган “Alkaloid AD Skopje” компанияси 85 йиллик тажриба ва фармацевтика, косметика ҳамда кимё соҳасидаги илғор технологиялари билан ҳамкорликка салмоқли ҳисса қўшиши кутилмоқда. Компания 2200 дан ортиқ ходимни иш билан таъминлайди, йиллик айланмаси 340 миллион еврога яқин ва маҳсулотлари Европа, АҚШ, Россия ва Қозоғистондан тортиб бошқа кўплаб халқаро бозорларда сотилади.
[gallery-28419]
Бу рақамлар ва тажриба шуни кўрсатадики, гап фақат ҳамкорлик ҳақида эмас, балки Жиззах фармацевтика салоҳиятидаги янги босқич ва Президент топшириқлари асосида амалга оширилаётган реал ишлар ҳақида бормоқда.
Учрашувдан сўнг хорижий меҳмонлар Жиззахда хорижий инвестициялар иштирокида фаолият юритаётган бир қатор корхоналарга ташриф буюриб, ҳудудда шаклланган саноат муҳитини ўз кўзлари билан кўрдилар. Бу ташриф шунчаки протокол тадбири эмас, балки амалдаги ислоҳотлар ва Президент топшириқларининг натижаси сифатида амалга оширилган воқеа ҳисобланади.
А. Қаюмов, Ж. Ёрбеков (сурат), ЎзА
