Жанубий Кореянинг собиқ президентига яна 30 йиллик қамоқ жазоси тайинланди
Юн Сок Ёль Жанубий Кореядаги дронлар билан боғлиқ иш бўйича 30 йилга озодликдан маҳрум этилди, деб хабар қилди DW нашри.
Сеул марказий туман суди 12 июнь куни чиққан ҳукмга кўра, 65 ёшли собиқ президент душман томонга ёрдам бериш ва мансаб ваколатини суиистеъмол қилишда айбдор деб топилди.
Тергов маълумотларига кўра, Юн Сок Ёль 2024 йил октябрь ойида жанговар дронларни Шимолий Корея пойтахти Пхеньян ҳаво ҳудудига юборишга кўрсатма берган. Прокуратуранинг таъкидлашича, бу ҳаракат мамлакатда ҳарбий ҳолат жорий этиш учун баҳона яратиш мақсадида амалга оширилган.
Собиқ президент эса бу айбловларни рад этмоқда. Юн Сок Ёль 2024 йил декабрь ойида мамлакатда ҳарбий ҳолат жорий этишга уринган эди. Бироқ парламент қаршилиги туфайли бу режа амалга ошмай қолган. Ушбу воқеалардан сўнг у президентлик лавозимидан четлатилди ва бу ҳолат Жанубий Корея жамиятида жиддий сиёсий бўлинишларга сабаб бўлди.
Эслатиб ўтамиз, 2026 йил февраль ойида Сеул марказий туман суди уни ҳокимият ваколатини суиистеъмол қилиш ва исёнга ундаш айбловлари билан умрбод қамоқ жазосига ҳукм қилган эди.
<iframe width="337" height="599" src="https://www.youtube.com/embed/edcC09ZBR6k" title="Janubiy Koreyaning sobiq prezidentiga yana 30 yillik qamoq jazosi tayinlandi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салимжон Обиджонов, ЎзА
