Жанубий Корея Президенти Вашингтон ва Пхеньян мулоқотини қайта тиклашга чақирди
Жанубий Корея Президенти Ли Жэ Мён Вашингтон ва Пхеньян ўртасидаги музокарани қайта йўлга қўйиш учун зарур шароит яратиш муҳимлигини таъкидлади. Корея ярим оролида тинчликни таъминлаш бўйича хорижий маслаҳатчилар учрашувида сўз юритган давлат раҳбари минтақадаги сулҳ тартибини ҳамкорлик ҳамда тараққиётга асосланган барқарор тинчлик тизимига айлантириш зарурлигини билдирди.
У икки Корея ўз кучи ва имкониятини фақат ўзаро қарама-қаршиликка сарфлаётган ачинарли вазиятни ўзгартириш шартлигини уқтирди. Маълумки, 1950-1953 йиллардаги уруш тинчлик шартномаси ўрнига фақат сулҳ битими билан якунлангани сабабли, икки мамлакат расман ҳануз уруш ҳолатида қолмоқда.
Бундан ташқари, Ли Жэ Мён мамлакат уруш давридаги ҳарбий қўмондонлик назоратини АҚШдан қайтариб олиши зарурлиги, ушбу жараённи 2030 йил якунланадиган ваколат муддати давомида амалга оширишга ваъда берганини эслатди.
Пхеньян Сеулни “душман давлат” дея эълон қилиб, алоқа йўлларини ёпган бўлса-да, Жанубий Корея раҳбари ҳокимиятга келгандан бери Шимол билан мулоқотни тиклаш ташаббусини изчил илгари сурмоқда. Ўз навбатида Президент Дональд Трамп ҳам дипломатик алоқани жонлантиришга уриниб, Шимолий Корея норозилигига сабаб бўладиган қўшма ҳарбий машғулотни қисқартириш таклифини илгари сурди. Шунга қарамай, КХДР Вашингтонга нисбатан салбий қарашни сақлаб қолмоқда. Сеул разведкаси маълумотига кўра, АҚШ ва КХДР мулоқотини қайта бошлаш аломати кўринаётган эса-да, ҳозирча аниқ мулоқот манбаси тасдиқланмаган.
Ф.Яхшибоева, ЎзА
