Икки бор шоҳсупага кўтарилди
Ракетка зарбаси, бир лаҳзалик қарор ва ҳар бир очко учун кечган кескин кураш... Халқаро майдонда ғалаба қозониш осон эмас. Бунинг учун спортчидан маҳорат билан бирга сабр, тезкорлик ва руҳий барқарорлик ҳам талаб этилади.
Сирдарёлик ёш бадминтончи Сўғдиёна Абдукаримова ана шундай мураккаб беллашувларда ўз маҳоратини намоён этиб, халқаро мусобақадан икки медаль билан қайтди.
Гулистон давлат педагогика институти Гуманитар фанлар ва жисмоний маданият факультетининг 2-босқич талабаси Сўғдиёна Тожикистоннинг Хўжанд шаҳрида ўтказилган бадминтон бўйича Марказий Осиё чемпионатида U23 ёш тоифасида иштирок этди. Мусобақада Марказий Осиёнинг қатор давлатларидан ташқари Монголия ва Эрон спортчилари ҳам майдонга чиқди.
Сирдарёлик спортчи учун чемпионат икки карра омадли кечди. У жамоавий баҳсларда 3-ўринни эгаллаб, бронза медалига сазовор бўлди. Жуфтлик баҳсларида ҳам муносиб иштирок этган Сўғдиёна яна 3-ўринни қўлга киритди.
Шу тариқа, бир чемпионатнинг ўзида икки бор шоҳсупага кўтарилган ёш спортчи коллекциясини иккита бронза медаль билан бойитди.
Бадминтонда рақибнинг ҳар бир ҳаракатини бир зумда англаш, зарба йўналишини ўзгартириш ва охирги очкогача курашиш муҳим. Сўғдиёнанинг қайд этган натижаси эса бу спорт туридаги меҳнат ва изчил тайёргарлик самараси эканини кўрсатди.
Икки бронза медаль — бу шунчаки статистик натижа эмас. Бу ёш спортчининг халқаро майдондаги тажрибаси, ўз кучига ишончи ва янги марралар сари интилиши учун муҳим қадамдир. Энг муҳими, Сўғдиёна учун бу шоҳсупа якуний манзил эмас, балки янада юксак натижалар сари бошланган янги босқичдир.
Ғулом Примов, ЎзА мухбири
