Ibn Sinoning «Axloq to‘g‘risida»gi risolasi asosida yangi ilmiy-ma’rifiy loyiha yaratilmoqda
Buyuk qomusiy olim va mutafakkir Abu Ali ibn Sinoning boy ma’naviy merosi nafaqat tibbiyot va falsafa, balki inson axloqi va kamoloti borasida ham bebaho manba hisoblanadi. Bugungi shiddatli globallashuv va raqamli asr jarayonlarida yosh avlodni yuksak ma’naviyatli, vatanparvar, keng dunyoqarashli va sog‘lom axloqiy me’yorlar ruhida tarbiyalash davlat siyosatining ustuvor yo‘nalishlaridan biriga aylangan bir paytda, yoshlar o‘rtasida milliy va umuminsoniy axloqiy me’yorlarni keng targ‘ib qilish har qachongidan ham muhim ahamiyat kasb etmoqda.
Ana shunday mas’uliyatli va sharafli vazifa ijrosini ta’minlash maqsadida Ibn Sino jamoat fondi mutaxassislari va yetakchi olimlari tomonidan keng qamrovli kompleks ilmiy-ma’rifiy va tarbiyaviy loyiha ishlab chiqilmoqda. Ushbu noyob ijtimoiy-ma’rifiy tashabbusning poydevori qilib ulug‘ allomaning «Axloq to‘g‘risida»gi risolasi belgilangani bejiz emas.
Asrlar osha o‘z dolzarbligini va yuksak ilmiy-falsafiy qimmatini yo‘qotmagan mazkur asar inson shaxsini shakllantirishda, uning ma’naviy kamolotiga erishishda muhim dasturilamal bo‘lib xizmat qiladi. Risolada insonning yaxshi va yomon xulq-atvori, axloqiy fazilatlar va jamiyat taraqqiyotiga soya soluvchi illatlarning mohiyati, ularning shakllanish omillari hamda insonni komillik sari yetaklovchi ma’naviy-axloqiy sifatlar haqida o‘ta chuqur, mantiqiy va ilmiy asoslangan fikrlar bayon etilgan.
Mazkur asarning eng muhim va ilg‘or jihatlaridan biri shundaki, unda insonning ma’naviy dunyosi aql, tarbiya va amaliy hayot bilan uzviy hamda uzviy bog‘liqlikda talqin qilinadi. Dono muallif inson axloqining mukammal tarzda shakllanishida aql-idrok, nafsni tiyish, o‘zini doimiy ravishda nazorat qilib borish va to‘g‘ri, puxta tarbiyaning o‘rni beqiyos ekanligini alohida ta’kidlaydi. Ibn Sino qarashlariga ko‘ra, sog‘lom aql bilan sug‘orilgan tarbiyagina insonni haqiqiy komillik darajasiga ko‘tarishga qodir.
Yaratilayotgan mazkur yangi kompleks ilmiy-ma’rifiy loyiha yoshlarning kundalik hayotiga ulug‘ allomaning boy ilmiy merosini zamonaviy pedagogik va raqamli usullar orqali yetkazish, ularda tanqidiy fikrlash, yuksak mas’uliyat va milliy qadriyatlarga hurmat tuyg‘ularini yanada kuchaytirishga xizmat qiladi.
Shubhasiz, bu kabi ma’rifiy tashabbuslar yoshlarimizning qalbida milliy g‘ururni yuksaltirib, ularning komil inson bo‘lib kamol topishida muhim va mustahkam poydevor bo‘lib xizmat qiladi.
Mohigul Qosimova,
O‘zA
