Ҳумоюн Султонов Словенияда чемпион бўлди
Словенияда Халқаро теннис федерацияси томонидан ташкил этилган эркаклар ўртасидаги М15 таснифига кирувчи мусобақанинг яккалик баҳсларида ҳамюртимиз Ҳумоюн Султонов бош совринни қўлга киритди.
Теннисчимиз турнир давомида илк босқичда италиялик Леонардо Примусчини, иккинчи даврада мезбонлар вакили Мак Миковични, чорак финалда яна бир италиялик теннисчи Александр Виесни, ярим финалда германиялик Максимилиан Гомбергни таслим этди ва финалда испаниялик Тито Чавез билан рақобатлашди.
Мусобақанинг сўнгги ҳал қилувчи учрашувида Ҳумоюн рақибини дастлабки сетда бирорта ҳам геймни бой бермаган ҳолда таслим этган бўлса, иккинчи сетда 7:5 ҳисобида ғалаба қозонди. Шу тариқа, Ҳумоюн Султонов турнирнинг бош соврини билан биргаликда 2 минг 160 АҚШ доллари пул мукофоти ва 21 рейтинг очкосини қўлга киритди.
Эслатиб ўтамиз, Ҳ.Султонов бундан аввал Австриянинг Клагенфурт шаҳрида финалга қадар ўтган барча баҳсларни муваффақиятли якунлаб, вице-чемпионга айланган эди.
Жавоҳир Тошхўжаев,
ЎзА
